അയ്യന്തോള്‍: വിരമിക്കുന്നതിന്റെ തലേദിവസം അടാട്ട് സെക്രട്ടറിയെ സസ്‌പെന്‍ഡ് ചെയ്തതില്‍ പ്രതിഷേധിച്ച് ഗ്രാമപഞ്ചായത്ത് പ്രസിഡന്റ് ടി.ആര്‍ ജയചന്ദ്രന്റെ നേതൃത്വത്തില്‍ ജനപ്രതിനിധികള്‍ എ.ഡി.പി ടിംപിള്‍ മാഗിയെ തടഞ്ഞു വെച്ചു.
ഇന്നു വിരമിക്കുന്ന സെക്രട്ടറി എ.എം പങ്കജത്തെയാണ് സസ്‌പെന്‍ഡ് ചെയ്തത്. പി.കെ ബിജു എം.പി യുടെ വ്യാജ പരാതിയുടെ അടിസ്ഥാനത്തിലാണ് പഞ്ചായത്ത് ഡയറക്ടര്‍ നടപടിയെടുത്തിരിക്കുന്നതെന്നാണ് ആരോപണം. കാലവര്‍ഷകെടുതിയില്‍ മാതൃകാപരമായി റിലീഫ് സെന്ററുകള്‍ നടത്തിയ ഗ്രാമപഞ്ചായത്തിനെ അപകീര്‍ത്തിപ്പെടുത്തുന്നതിനായിട്ടാണ് സെക്രട്ടറിക്കെതിരേ നടപടിയെടുത്തതെന്ന് ജനപ്രതിനിധികള്‍ ആരോപിച്ചു.
ജില്ലാ പഞ്ചായത്തംഗം അജിതാകൃഷ്ണന്‍, മുന്‍പ്രസിഡന്റ് വി.ഒ ചുമ്മാര്‍, ബ്ലോക്ക് പഞ്ചായത്ത് വൈസ് പ്രസിഡന്റ് സുമ ഹരി, സ്ഥിരം സമിതി അധ്യക്ഷന്‍മാരായ സി.വി കുരിയാക്കോസ്, ടി. ജയലക്ഷ്മി ടീച്ചര്‍, ഗ്രാമപഞ്ചായത്ത് വൈസ് പ്രസിഡന്റ് ശോഭ ജയദാസന്‍, സ്ഥിരം സമിതി അധ്യക്ഷന്‍മാരായ പി. രാജേശ്വരന്‍, പി.ജെ സണ്ണി, ശൈലജ ശ്രീനിവാസന്‍, അംഗങ്ങളായ ടി.ഡി വിന്‍സന്‍, സി.ആര്‍ രാധാകൃഷ്ണന്‍, കെ.പി സുനില്‍കുമാര്‍, വാസന്തി ദാമോദരന്‍, മായ മനോജ് പങ്കെടുത്തു.
പ്രസ്തുത വിഷയത്തില്‍ അന്വേഷണം നടത്തിയ ഡി.ഡി.പി ഓഫിസിലെ സീനിയര്‍ സൂപ്രണ്ട് അടാട്ട് ഗ്രാമപഞ്ചായത്ത് നല്‍കിയ വിശദമായ മറുപടി ഡി.ഡി.പി, ഡയറക്ടര്‍ ഓഫ് പഞ്ചായത്ത് എന്നിവര്‍ക്ക് നല്‍കാതെ മറച്ചുവെച്ചത് ദുരൂഹമാണെന്നു പ്രസ്തുത വിഷയത്തെ സംബന്ധിച്ചും അന്വേഷണം നടത്തി സീനിയര്‍ സൂപ്രണ്ടിനെതിരേ നടപടി സ്വീകരിക്കണമെന്നും ജനപ്രതിനിധികള്‍ ആവശ്യപ്പെട്ടു.
തൃശൂര്‍ എ.സി.പി വി.കെ രാജുവിന്റെ നേതൃത്വത്തിലുള്ള പൊലിസ് എത്തി സമരക്കാരെ നീക്കം ചെയ്തു.