അരീക്കോട്: പഞ്ചായത്തിന്റെ അഭിമുഖ്യത്തില്‍ ബഡ്‌സ് സ്‌കൂള്‍ തുടങ്ങുന്നതിനുള്ള നടപടിക്രമങ്ങള്‍ക്ക് തുടക്കമായി. ജൂണ്‍ രണ്ടാം വാരത്തില്‍ സ്‌കൂളിന്റെ പ്രവര്‍ത്തനമാരംഭിക്കാനാണ് പഞ്ചായത്തിന്റെ തീരുമാനം. കെട്ടിടം പണിയുന്നതിന് ജില്ലാ പഞ്ചായത്തിന്റെ നിയന്ത്രണത്തിലുള്ള അരീക്കോട് ഗവ. ഹയര്‍സെക്കന്‍ഡറി സ്‌കൂളിനോട് ചേര്‍ന്നുള്ള 30 സെന്റ് സ്ഥലം വിട്ടുനല്‍കും.
സ്‌കൂള്‍ പി.ടി.എ, എസ്.എം.എസി കമ്മിറ്റികളും അനുമതി നല്‍കിയതോടെ എത്രയും പെട്ടെന്ന് കെട്ടിട നിര്‍മാണം പൂര്‍ത്തീകരിക്കാനാവശ്യമായ നടപടികള്‍ ആരംഭിച്ചതായി പഞ്ചായത്ത് പ്രസിഡന്റ് അമ്പാഴത്തിങ്ങല്‍ മുനീറ പറഞ്ഞു. കളിക്കളം, വായനശാല, അംഗപരിമിതര്‍ക്കാവശ്യമായ ടോയ്‌ലറ്റ് സംവിധാനം എന്നിവ ഉള്‍ക്കൊള്ളിച്ച് അത്യാധുനിക സൗകര്യത്തോടെയുള്ള ബഡ്‌സ് സ്‌കൂളാണ് പഞ്ചായത്ത് ലക്ഷ്യമിടുന്നത്.
ഒരു കോടി രൂപ ചെലവഴിച്ചാണ് നിര്‍മാണം പൂര്‍ത്തീകരിക്കുക. എം.പി, എം.എല്‍.എ ഫണ്ടുകളും കുടുംബശ്രീ, സാമൂഹ്യ സുരക്ഷാ മിഷന്‍ എന്നിവയെ ആശ്രയിച്ചുമായിരിക്കും കെട്ടിടത്തിന്റെ നിര്‍മാണം പുരോഗമിക്കുക. സ്വന്തമായി കെട്ടിടമുണ്ടെങ്കില്‍ ജില്ലാ പഞ്ചായത്തിന്റെ നേതൃത്വത്തില്‍ സ്‌കൂളിലെ വിദ്യാര്‍ഥികള്‍ ബസ് സൗകര്യവും ഏര്‍പ്പെടുത്തും. സംസ്ഥാന ബജറ്റില്‍ ജില്ലക്ക് പ്രഖ്യാപിച്ച നാല് ബഡ്‌സ് സ്‌കൂളുകളില്‍ അരീക്കോടിനെ ഉള്‍പ്പെടുത്താന്‍ പഞ്ചായത്ത് അധികൃതര്‍ പി.കെ ബഷീര്‍ എം എല്‍ എയോട് ആവശ്യപ്പെട്ടിട്ടുണ്ട്. 207 ഭിന്നശേഷിക്കാരാണ് അരീക്കോട് പഞ്ചായത്തിലുള്ളത്. ഭിന്നശേഷിക്കാരായ വിദ്യാര്‍ഥികളുടെ രക്ഷിതാക്കള്‍ക്കായി തൊഴില്‍ പരിശീലന കേന്ദ്രം ആരംഭിക്കുമെന്ന് പഞ്ചായത്ത് പ്രസിഡന്റ് പറഞ്ഞു.