ബഗ്ദാദ്: സമാധാനത്തിന്റെ നൊബേലെന്ന ലോകത്തിലെ ഉന്നത പുരസ്‌കാരത്തിലേക്കെത്തിയ നാദിയ മുറാദിന്റെ വഴികളില്‍ ദുഃഖത്തിന്റെയും സഹനത്തിന്റെയും പൊള്ളിക്കുന്ന അനുഭവങ്ങളുണ്ട്. ഇറാഖിലെ യസീദി വിഭാഗത്തില്‍പ്പെട്ട 25 കാരിയായ നാദിയ മുറാദ് വടക്കന്‍ ഇറാഖിലെ സിന്‍ജാറിലാണ് ജനിച്ചത്. സിറിയയുമായി അതിര്‍ത്തി പങ്കിടുന്ന പ്രദേശമാണിത്. എന്നാല്‍ 2014ല്‍ ക്രൂരതയുടെ മുഖമുദ്രയുമായി ഐ.എസ് തീവ്രവാദികളുടെ കടുന്നുവരവാണ് അവളുടെ അതുവരെ ശാന്തമായിരുന്ന ജീവിതത്തിന് ഭംഗം വരുത്തിയത്.
അതേവര്‍ഷം ഓഗസ്റ്റിലാണ് കറുത്ത പതാകയേന്തി മുറാദിന്റെ ഗ്രാമമായ കൊച്ചോയിലേക്ക് ഐ.എസ് ഇരച്ചുകയറിയത്. പ്രദേശം മുഴുവനായും തകര്‍ത്തു. നിരവധി പേരെ കൊലപ്പെടുത്തി. കുട്ടികളെ തീവ്രവാദ പ്രവര്‍ത്തനങ്ങള്‍ക്കുള്ള പരിശീലനം നല്‍കാനായി പിടിച്ചുകൊണ്ടുപോയി. സൗന്ദര്യമില്ലാത്തവരെയും ചെറിയ കുട്ടികളെയും ക്രൂരമായി കൊലപ്പെടുത്തി. ആയിരക്കണക്കിന് യുവതികളെ ലൈംഗിക അടിമകളാക്കി. നാദിയ ഉള്‍പ്പെടെയുള്ള യുവതികളെ ഐ.എസ് അധീനത്തിലുള്ള മൊസൂളിലേക്കാണു കൊണ്ടുപോയത്. അവിടെ ക്രൂരമായ മര്‍ദനങ്ങള്‍ക്കും പീഡനങ്ങള്‍ക്കും ഇരയാക്കി.
ഭീകരര്‍ ലൈംഗിക അടിമയാക്കിവച്ച നാദിയയെ പിന്നീട് ഒരു വില്‍പ്പനച്ചരക്കിനെയെന്നവണ്ണം മൊസൂളിലെ അടിമച്ചന്തയില്‍ വില്‍ക്കുകയും വാങ്ങുകയും ചെയ്തു. ഉടമയ്ക്ക് എപ്പോള്‍ വേണമെങ്കിലും മാനഭംഗം ചെയ്യാനാകുന്ന ഇരയെന്ന നിര്‍വചനത്തില്‍പ്പെട്ട ലൈംഗിക അടിമയായി മുദ്രകുത്തപ്പെട്ട നാദിയ നീണ്ട മൂന്നുമാസത്തോളം യാതനകള്‍ സഹിച്ചു. ഒരിക്കല്‍ രക്ഷപ്പെടാന്‍ ശ്രമിച്ചതിനു കൂട്ടമാനഭംഗമായിരുന്നു ശിക്ഷ.
ദുരിതപര്‍വത്തിനിടെ തടവിലാക്കപ്പെട്ട വീട്ടിലെ ജനല്‍ വഴി ഒരു ദിവസം രക്ഷപ്പെട്ട നാദിയയ്ക്കു മറ്റൊരു മുസ്‌ലിം കുടുംബമാണു രക്ഷകരായത്. ഐ.എസിന്റെ കണ്ണുവെട്ടിച്ച് അവര്‍ നാദിയയെ സാഹസികമായി കുര്‍ദിസ്ഥാനിലെത്തിച്ചു. തന്റെ മാതാവിനെയും ആറ് സഹോദരന്മാരെയും ഐ.എസ് കൊലപ്പെടുത്തിയെന്ന വിവരം ഇവിടെ നിന്നാണ് അവര്‍ അറിയുന്നത്.
ഒടുവിലൊരു ദിവസം ഇറാഖ് അതിര്‍ത്തി കടന്നു ജര്‍മനിയിലേക്ക് അവള്‍ രക്ഷപ്പെടുകയായിരുന്നു. നിലവില്‍ ജര്‍മനിയില്‍ ജീവിക്കുന്ന നാദിയ തന്റെ സഹോദരിക്കൊപ്പം യസീദികള്‍ക്കായുള്ള സന്നദ്ധ പ്രവര്‍ത്തനങ്ങള്‍ നടത്തുന്നു. യസീദ് വിഭാഗത്തിന്റെ അവകാശങ്ങളുടെയും പോരാട്ടത്തിന്റെയും അന്താരാഷ്ട്ര ശബ്ദമാണ് നാദിയ.
ലൈംഗിക അടിമകളാക്കപ്പെടുന്ന പെണ്‍കുട്ടികളുടെ മോചനത്തിനായി പ്രവര്‍ത്തിക്കുന്ന നാദിയയുടെ ജീവിതം പറയുന്ന 'ദി ലാസ്റ്റ് ഗേള്‍' 2017ല്‍ ആണ് പ്രസിദ്ധീകരിച്ചത്. യസീദി ആക്ടിവിസ്റ്റായ ആബിദ് ശബ്ദീനുമായുള്ള നാദിയയുടെ വിവാഹം ഓഗസ്റ്റ് അറിന് പ്രഖ്യാപിച്ചിരുന്നു. ഇറാഖിലെ ന്യൂനപക്ഷ വിഭാഗമായ യസീദികളുടെ എണ്ണം 2014ല്‍ അഞ്ചര ലക്ഷമായിരുന്നു. എന്നാല്‍ ഐ.എസ് ആക്രമണത്തെ തുടര്‍ന്ന് ഒരു ലക്ഷം പേരാണ് രാജ്യം വിട്ടത്.