കോട്ടയം: ബിഷപ്പ് ഫ്രാങ്കോ മുളയ്ക്കല്‍ പ്രതിയായ ലൈംഗിക പീഡന കേസ് അട്ടിമറിക്കാന്‍ വീണ്ടും ശ്രമം നടക്കുന്നതായി കുറവിലങ്ങാട് മഠത്തിലെ കന്യാസ്ത്രീകളുടെ ആരോപണം. ഫോറന്‍സിക് ലാബില്‍ നിന്ന് കൈമാറിയ രേഖകളില്‍ പിശക് വന്നത് സംശയകരമാണെന്നും കേസ് അനന്തമായി നീട്ടിക്കൊണ്ടു പോകുന്നുവെന്നും സിറ്റര്‍ അനുപമ പറഞ്ഞു.
തിരുവനന്തപുരത്തെ ഫോറന്‍സിക് ലാബില്‍ നിന്ന് കോടതിക്കും അന്വേഷണ ഉദ്യോഗസ്ഥര്‍ക്കും കൈമാറിയ രേഖകളില്‍ വൈരുധ്യമുണ്ടെന്ന് കഴിഞ്ഞ ദിവസം കണ്ടെത്തിയിരുന്നു. ബിഷപ്പും ഇരയായ കന്യാസ്ത്രീയും തമ്മിലുള്ള ഫോണ്‍ സംഭാഷണം ഉള്‍പ്പെടെയുള്ള തെളിവുകള്‍ ഡി.വി.ഡിയിലാക്കിയപ്പോഴാണ് പിശക് സംഭവിച്ചത്.
തെളിവുകള്‍ പൂര്‍ണമായി കൈമാറാത്തത് കേസ് അട്ടിമറിക്കാനുള്ള നീക്കത്തിന്റെ ഭാഗമായാണെന്ന് സിസ്റ്റര്‍ അനുപമ ആരോപിച്ചു.