ചെങ്ങന്നൂര്‍: ദുരിതാശ്വാസ ക്യാംപുകളില്‍ പാകം ചെയ്ത ഭക്ഷണസാധനങ്ങള്‍ എത്തിച്ചു നല്‍കരുതെന്ന് മന്ത്രി ജി സുധാകരന്‍. പ്രളയ ദുരിതാശ്വാസ പ്രവര്‍ത്തനങ്ങളുമായി ബന്ധപ്പെട്ട് ചെങ്ങന്നൂര്‍ ആര്‍.ഡി.ഒ ഓഫിസില്‍ ജനപ്രതിനിധികളുടെയും ബന്ധപ്പെട്ട ഉദ്യോഗസ്ഥരുടെയും അവലോകന യോഗത്തിനു ശേഷം നടത്തിയ പത്രസമ്മേളനത്തില്‍ സംസാരിക്കുകയായിരുന്നു അദ്ദേഹം. ക്യാംപുകളുടെ ചുമതല അതാത് പ്രദേശത്തെ വില്ലേജ് ഓഫിസര്‍മാര്‍ക്കാണ്. ക്രമസമാധാന പാലനത്തിനായി പൊലിസിനെയും നിയോഗിച്ചിട്ടുണ്ട്.

എല്ലാ ക്യാംപുകളിലും സര്‍ക്കാര്‍ ഭക്ഷണം നല്‍കുന്നുണ്ട്. അതിനാല്‍ പുറത്തുനിന്നുള്ള പാകം ചെയ്ത ഭക്ഷണ സാധനങ്ങളുടെ ആവശ്യമില്ല. ചില ക്യാംപുകളില്‍ രാഷ്ട്രീയ പാര്‍ട്ടികള്‍ കൊടിയും പിടിച്ച് ജാഥയായി എത്തി പാകം ചെയ്ത ഭക്ഷണ സാധനങ്ങള്‍ വിതരണം ചെയ്തതായി ശ്രദ്ധയില്‍ പെട്ടിട്ടുണ്ട്. ഇത് ക്രിമിനല്‍ കുറ്റമാണ്. ഇത്തരക്കാര്‍ക്കെതിരേ നടപടി സ്വീകരിക്കുമെന്ന് മന്ത്രി പറഞ്ഞു. ക്യാംപുകളിലേക്കു മറ്റ് ആവശ്യവസ്തുക്കള്‍ നല്‍കണമെന്ന് താല്‍പര്യമുള്ള സംഘടനകള്‍ക്കും വ്യക്തികള്‍ക്കും ഇവ എം.എല്‍.എ, ആര്‍.ഡി.ഒ, വില്ലേജ് ഓഫിസര്‍മാര്‍ എന്നിവരെ ഏല്‍പ്പിക്കാം. പറമ്പുകളിലും പൊതു സ്ഥലങ്ങളിലും നില്‍ക്കുന്ന ചാഞ്ഞ മരങ്ങള്‍ ബന്ധപ്പെട്ടപ്പെട്ടവര്‍ മുറിച്ചു മാറ്റണമെന്ന് മന്ത്രി ഓര്‍മിപ്പിച്ചു. സജി ചെറിയാന്‍ എം.എല്‍.എ, ആര്‍ ഡി.ഒ ജി. ഉഷാകുമാരി എന്നിവര്‍ പങ്കെടുത്തു.