ബെയ്ജിങ്: ഒക്ടോബര്‍ മുതല്‍ നികുതി ചുമത്തിയ ചൈനീസ് ഉല്‍പന്നങ്ങള്‍ക്കുമേല്‍ 25-30 ശതമാനം നികുതി വീണ്ടും ചുമത്തുമെന്ന് ഭീഷണിപ്പെടുത്തി യു.എസ് പ്രസിഡന്റ് ട്രംപ്. നിലവില്‍ 10-15 ശതമാനം നികുതിയുള്ള ഉല്‍പന്നങ്ങള്‍ക്ക് സപ്തംബര്‍ ഒന്നു മുതല്‍ 3,000 കോടി ഡോളറിന്റെ നികുതി ചുമത്തുമെന്നും ട്രംപ് മുന്നറിയിപ്പു നല്‍കി.
അതേസമയം ചൈനീസ് ഉല്‍പന്നങ്ങള്‍ക്കു മേല്‍ അനാവശ്യമായി അധികനികുതി ചുമത്തുന്നത് യു.എസ് അവസാനിപ്പിക്കണമെന്നും അല്ലാത്തപക്ഷം തെറ്റായ നടപടിക്ക് പ്രത്യാഘാതം നേരിടേണ്ടിവരുമെന്നും ചൈനീസ് വാണിജ്യമന്ത്രാലയം മുന്നറിയിപ്പു നല്‍കി.
ഒക്ടോബര്‍ ഒന്നിന് 2,500 കോടി ഡോളറിനു തുല്യമായ 30 ശതമാനം നികുതി ചൈനീസ് ഉല്‍പന്നങ്ങള്‍ക്ക് ഏര്‍പ്പെടുത്തിയ യു.എസ് അവശേഷിക്കുന്ന ചൈനീസ് ഉല്‍പന്നങ്ങള്‍ക്കുമേല്‍ 5,500 കോടി ഡോളറിന്റെ നികുതി കഴിഞ്ഞദിവസം ചുമത്തിയിരുന്നു.
നേരത്തെ യു.എസ് ഉല്‍പന്നങ്ങള്‍ക്ക് ചൈന 750 കോടി ഡോളറിന്റെ അധികനികുതി ചുമത്തിയിരുന്നു. അതേസമയം ട്രംപിന്റെ പ്രഖ്യാപനത്തോടെ ഡൗജോണ്‍സ് ഓഹരി സൂചിക 623 പോയിന്റ് ഇടിഞ്ഞു. ലോകരാജ്യങ്ങളും വ്യാവസായിക സ്ഥാപനങ്ങളും ട്രംപിന്റെ നീക്കത്തെ വിമര്‍ശിച്ചു.
യു.എസ് കമ്പനികളോട് ചൈന വിടണമെന്ന് താന്‍ ആവശ്യപ്പെടുമെന്ന് കഴിഞ്ഞ ദിവസം ട്രംപ് ഭീഷണിപ്പെടുത്തിയിരുന്നു. 1977ലെ നിയമമനുസരിച്ച് തനിക്ക് ഇതിന് ഉത്തരവിടാന്‍ അധികാരമുണ്ടെന്നും അദ്ദേഹം പറഞ്ഞു. യു.എസ് ഉല്‍പന്നങ്ങള്‍ക്ക് ചൈന 750 കോടി ഡോളറിന്റെ നികുതി ചുമത്തിയതാണ് ട്രംപിനെ പ്രകോപിപ്പിച്ചത്.