മസ്‌കത്ത്: റോഹിംഗ്യന്‍ അഭയാര്‍ഥികളെ സഹായിക്കുന്നതിനായി ഒമാന്‍ ചാരിറ്റബിള്‍ ഓര്‍ഗനൈസേഷന്‍ ബംഗ്ലാദേശില്‍ ആയിരം വീടുകള്‍ നിര്‍മിച്ച് നല്‍കുന്നു. ഇവയില്‍ 107 എണ്ണം പൂര്‍ത്തിയായതായും ബാക്കിയുള്ളവയുടെ നിര്‍മാണം ദ്രുതഗതിയില്‍ നടന്ന് കൊണ്ടിരിക്കുന്നതായും അധികൃതര്‍ അറിയിച്ചു. യുനൈറ്റഡ് നേഷന്‍സ് റിലീഫ് ഏജന്‍സിക്കും ബംഗ്ലാദേശിനും ആണ് ക്യാംപ് നടത്തിപ്പിന്റെ ചുമതല. റോഹിംഗ്യന്‍ പ്രതിസന്ധിയെത്തുടര്‍ന്ന് രാജ്യത്തെ സഹായിക്കാന്‍ തയാറായ ഒമാന് ബംഗ്ലാദേശ് വിദേശകാര്യ മന്ത്രി അബുല്‍ ഹസ്സന്‍ മഹ്മൂദ് അലി നന്ദി അറിയിച്ചു.