തിരുവനന്തപുരം: കേരളത്തിന്റെ പുനഃര്‍നിര്‍മാണത്തിനായി ധനശേഖരണാര്‍ഥമുള്ള മന്ത്രിമാരുടെ വിദേശയാത്രയ്ക്ക് അനുമതി നിഷേധിച്ച കേന്ദ്രസര്‍ക്കാരിനെ വിമര്‍ശിച്ച് മുഖ്യമന്ത്രി പിണറായി വിജയന്‍. വിദേശയാത്രയ്ക്ക് ആദ്യം അനുമതി നല്‍കിയ കേന്ദ്രം പിന്നീട് അത് നിഷേധിക്കുന്നത് മുട്ടാപ്പോക്ക് നയമാണ്.

ഗുജറാത്തിന്റെ മുഖ്യമന്ത്രിയായി നരേന്ദ്രമോദി ഇരുന്ന സമയത്ത് ഗുജറാത്തിലുണ്ടായ ദുരന്തത്തില്‍ വിദേശ സഹായം സ്വീകരിച്ചിട്ടുണ്ട്. പിന്നെ കേരളത്തിനോട് മാത്രം എന്താണ് പ്രത്യേക നിലപാടെന്നും മുഖ്യമന്ത്രി ചോദിച്ചു. മറ്റു രാജ്യങ്ങളില്‍ പോകുന്നത് യാചിക്കാനാല്ല. നമ്മുടെ സഹോദരങ്ങളെ കാണാനാണ്. അവര്‍ സഹായിക്കാന്‍ തയ്യാറാണ്. പൂജാ അവധിയായതിനാല്‍ മന്ത്രിമാര്‍ ഒന്നിച്ചു പോയാലും ഒന്നും സംഭവിക്കുമായിരുന്നില്ലെന്നും പിണറായി പറഞ്ഞു.