കാര്‍ഡിഫ്: ഐ.സി.സി ചാംപ്യന്‍സ് ട്രോഫിയിലെ നിര്‍ണായക പോരാട്ടത്തില്‍ ന്യൂസിലന്‍ഡിനെ വീഴ്ത്തി ബംഗ്ലാദേശ് ഉജ്ജ്വല വിജയത്തോടെ സെമി സാധ്യതകള്‍ സജീവമാക്കി. അഞ്ച് വിക്കറ്റിന്റെ വിജയമാണ് ബംഗ്ലാദേശ് സ്വന്തമാക്കിയത്. ആദ്യം ബാറ്റ് ചെയ്ത കിവികള്‍ നിശ്ചിത 50 ഓവറില്‍ എട്ട് വിക്കറ്റ് നഷ്ടത്തില്‍ 265 റണ്‍സെടുത്തപ്പോള്‍ ബംഗ്ലാദേശ് 47.2 ഓവറില്‍ അഞ്ച് വിക്കറ്റ് നഷ്ടത്തില്‍ 268 റണ്‍സെടുത്താണ് വിജയം സ്വന്തമാക്കിയത്. തോല്‍വിയോടെ ന്യൂസിലന്‍ഡിന്റെ സെമി പ്രതീക്ഷികള്‍ അവസാനിച്ചപ്പോള്‍ ആസ്‌ത്രേലിയ ഇന്ന് ഇംഗ്ലണ്ടിനോട് പരാജയപ്പെട്ടാല്‍ ഇംഗ്ലണ്ടിനൊപ്പം ബംഗ്ലാദേശിനും സെമിയിലെത്താം.
ടോസ് നേടി ന്യൂസിലന്‍ഡ് ബാറ്റ് ചെയ്യാന്‍ തീരുമാനിക്കുകയായിരുന്നു. മുന്‍നിര ബാറ്റ്‌സ്മാന്‍മാരുടെ മികവിലാണ് കിവികള്‍ പൊരുതാവുന്ന സ്‌കോറിലെത്തിയത്.
വെറ്ററന്‍ താരം റോസ് ടെയ്‌ലര്‍ 63 റണ്‍സുമായി ടോപ് സ്‌കോററായി. നായകന്‍ കെയ്ന്‍ വില്ല്യംസന്‍ 57ഉം ഓപണര്‍ മാര്‍ടിന്‍ ഗുപ്റ്റില്‍ 33ഉം നെയ്ല്‍ ബ്രൂം 36ഉം റണ്‍സെടുത്തു.