വടകര: കുഞ്ഞിപ്പള്ളി റെയില്‍വേ മേല്‍പ്പാലം ഗതാഗതയോഗ്യമാക്കുന്ന നടപടികള്‍ വൈകുന്നതില്‍ പ്രതിഷേധം ശക്തമാകുന്നു.
മേല്‍പ്പാലം ഗതാഗതത്തിന് തുറന്നുകൊടുക്കുന്നതുമായി ബന്ധപ്പെട്ട് ദേശീയപാത പൊതുമരാമത്ത് വിഭാഗം ഉന്നതതല യോഗം വിളിച്ചുചേര്‍ക്കണമെന്ന് അഴിയൂര്‍ പഞ്ചായത്ത് പ്രസിഡന്റ് ഇ.ടി അയ്യൂബ് ആവശ്യപ്പെട്ടു.മേല്‍പ്പാലം ഗതാഗതയോഗ്യമാക്കാന്‍ സത്വരനടപടിയെടുക്കണമെന്ന് താലൂക്ക് വികസന സമിതിയംഗം പ്രദീപ് ചോമ്പാല ആവശ്യപ്പെട്ടു.
നിലവില്‍ മേല്‍പ്പാലത്തിന്റെ പണി അവസാനഘട്ടത്തിലാണ്. മേല്‍പാലം അവസാനിക്കുന്ന ദേശീയപാതയുടെ ഭാഗത്ത് ജങ്ഷന്‍ സംവിധാനവും സിഗ്‌നല്‍ ലൈറ്റ് അടക്കമുള്ളപ്രവൃത്തികള്‍ നടന്നാലെ പാലത്തിലൂടെ വാഹനങ്ങള്‍ക്ക് പോകാന്‍ സാധിക്കൂ. എന്നാല്‍ ഇക്കാര്യത്തില്‍ ഒരു നടപടിയും പി.ഡബ്ല്യു.ഡി ദേശീയപാത വിഭാഗം ഇതുവരെ എടുത്തിട്ടില്ല.
ഈ പ്രവൃത്തികള്‍ക്ക് ഫണ്ട് അനുവദിക്കുകയും ചെയ്തിട്ടില്ല. പ്രവൃത്തി നടക്കുന്ന സ്ഥലത്ത് ദേശീയപാത വിഭാഗം ഉദ്യോഗസ്ഥര്‍ ഇതുവരെ സന്ദര്‍ശനം നടത്തിയിട്ടില്ല.