നിലമ്പൂര്‍: മേഖലയില്‍ പനി വ്യാപിച്ച സാഹചര്യത്തില്‍ നിലമ്പൂര്‍ ജില്ലാ ആശുപത്രിയില്‍ കൂടുതല്‍ ജീവനക്കാരെ നിയമിക്കണമെന്ന ആവശ്യം ശക്തമാകുന്നു. ജില്ലാ ആശുപത്രിയായി സര്‍ക്കാര്‍ പ്രഖ്യാപനം വന്നെങ്കിലും അതിനാവശ്യമായ ജീവനക്കാരെ ഇനിയും ആശുപത്രിയില്‍ നിയമിച്ചിട്ടില്ല.  സര്‍ക്കാര്‍ സ്ഥാപനങ്ങളുടെ സേവനം മെച്ചപ്പെടുത്തുന്നതിന്റെ ഭാഗമായി എം.എല്‍.എ.യുടെ ഇടപെടലുകള്‍ നടക്കുന്നില്ലെന്ന ആക്ഷേപവും നിലവിലുണ്ട്.
142 പേരെ കിടത്തി ചികില്‍സിക്കാന്‍ സൗകര്യമുള്ള ജില്ലാ ആശുപത്രിയില്‍ നിലവില്‍ മൂന്നൂറിലേറെ പേരാണ് കിടത്തി ചികില്‍സയിലുളളത്. അവര്‍ക്കാവശ്യമായ ജീവനക്കാര്‍ ഇല്ലാത്തതാണ് വലിയ പ്രശ്‌നമാകുന്നത്.51 സ്റ്റാഫ് നഴ്‌സുമാരാണ് നിലമ്പൂര്‍ ജില്ലാ ആശുപത്രിയിലുളളത്. രോഗികളുടെ എണ്ണം എത്രയോ കൂടുതലുമാണ്. മഴ തുടങ്ങിയതോടെ ദിവസവും 1500-ഓളം രോഗികള്‍ ആശുപത്രിയില്‍ എത്തുന്നുണ്ട്. ഇതില്‍ പകുതിയോളം പേരും പനിബാധിതരായാണെത്തുന്നത്. ഒരു വാര്‍ഡില്‍ ഒരു നഴ്‌സിന്റെ സേവനം മാത്രമാണ് കിട്ടുന്നത്.
വിശ്രമിക്കാനുള്ള സമയംപോലും അവര്‍ക്ക് കിട്ടുന്നില്ല. എന്നാല്‍ സമീപത്തെ പ്രാഥമിക ആശുപത്രികളില്‍ കിടത്തി ചികില്‍സ ഇല്ലാതിരുന്നിട്ടും നാലും അഞ്ചും സ്റ്റാഫ് നഴ്‌സുമാര്‍ ഉണ്ട്. ഉച്ചവരെയുള്ള ഒ.പി. ചികില്‍സ മാത്രമാണിവിടങ്ങളില്‍ നടക്കുന്നത്. ഇവിടെ നിന്നുള്ള സ്റ്റാഫ് നഴ്‌സുമാരില്‍ ചിലരെ ജോലി പുന:ക്രമീകരണത്തിന്റെ ഭാഗമായി നിലമ്പൂര്‍ ജില്ലാ ആശുപത്രിയിലേക്ക് മാറ്റി നിയമിക്കണമെന്ന ആവശ്യവും ഉണ്ട്. കഴിഞ്ഞ ദിവസം പൊതുപ്രവര്‍ത്തകര്‍ ജില്ലാ ആശുപത്രിയിലേക്ക് നടത്തിയ മാര്‍ച്ചിനെ തുടര്‍ന്ന് രണ്ട് പേരെ പുന:ക്രമീകരണത്തിന്റെ ഭാഗമായി നിയമിച്ചിട്ടുണ്ട്. എന്നാല്‍ ഇതുകൊണ്ടു മാത്രം തീരുന്നതല്ല നിലമ്പൂര്‍ ജില്ലാ ആശുപത്രിയിലെ പ്രശ്‌നങ്ങള്‍. ഇനിയും കൂടുതല്‍ ജീവനക്കാരെ നിയമിച്ചാല്‍ മാത്രമേ രോഗികളുടെ ദുരിതത്തിന് ആശ്വാസമാകുകയുള്ളു.