കൊച്ചി: മരടിലെ ഫ്‌ളാറ്റുകള്‍ നിര്‍മിച്ചത് നിയമം ലംഘിച്ചാണെന്നതിന്റെ രേഖകള്‍ പുറത്തുവന്നതോടെ നിര്‍മാതാക്കള്‍ക്കെതിരേ നിയമനടപടികളുമായി ഫ്‌ളാറ്റ് ഉടമകള്‍ രംഗത്ത്. ഇവിടെ നടക്കുന്നത് നിയമവിരുദ്ധമായ നിര്‍മാണമാണെന്ന് കാണിച്ചുതന്നെയാണ് നഗരസഭ ഉടമകള്‍ക്ക് മറുപടി നല്‍കിയിരുന്നതെന്നാണ് പുറത്തുവരുന്ന രേഖകള്‍. ഇതേക്കുറിച്ച് തങ്ങള്‍ക്കറിവുണ്ടായിരുന്നില്ലെന്നും അതുകൊണ്ടുതന്നെ ഈ കൊടും ചതിക്കെതിരേ ഏതറ്റംവരേയും പോകുമെന്നുമാണ് ഉടമകള്‍ പറയുന്നത്.
എന്തു വന്നാലും ഫ്‌ളാറ്റുകളില്‍ നിന്ന് ഒഴിയില്ലെന്നും ഇവര്‍ വ്യക്തമാക്കുന്നു. കോടതി ഉത്തരവുണ്ടായാല്‍ ഇവിടെനിന്ന് ഒഴിയേണ്ടി വരുമെന്നായിരുന്നു നിര്‍മാതാക്കള്‍ക്ക് നഗരസഭ നല്‍കിയ കൈവശരേഖയില്‍ പറഞ്ഞിരുന്നത്. ജെയിനും ആല്‍ഫാ എന്നീ രണ്ട് ഫ്‌ളാറ്റ് ഉടമകള്‍ക്കാണ് യു.എ നമ്പര്‍ പ്രകാരം മറുപടി നല്‍കിയിരുന്നത്. യു.എ നമ്പര്‍ നിയമംലംഘിച്ച് നടത്തുന്ന കെട്ടിടങ്ങള്‍ക്ക് നല്‍കുന്ന മറുപടിയാണ്. മറ്റു ഉടമകള്‍ക്ക് മറുപടി നല്‍കിയതും ഉപാധികളോടെയായിരുന്നു. ഈ മുന്നറിയിപ്പ് അംഗീകരിച്ചുതന്നെയാണ് ഫ്‌ളാറ്റ് ഉടമകള്‍ മറുപടി കൈപ്പറ്റുകയും നിര്‍മാണവുമായി മുന്നോട്ടുപോകുകയും ചെയ്തത്.