കൊച്ചി: ഫ്‌ളാറ്റ് ഒഴിയാന്‍ തയാറാണെന്നും എന്നാല്‍ ചില ഉപാധികള്‍ സര്‍ക്കാര്‍ സമ്മതിച്ചേ മതിയാകൂ എന്നും ചൂണ്ടിക്കാട്ടി ഉടമകള്‍. ഒഴിഞ്ഞു പോകാന്‍ കൂടുതല്‍ സമയം അനുവദിക്കണമെന്നതാണ് ഇതിലെ ഒരാവശ്യം. നഷ്ടപരിഹാരം വേഗത്തില്‍ നല്‍കണം. അതിനു മുമ്പ് വൈദ്യുതി ഉടന്‍ പുനഃസ്ഥാപിച്ചു നല്‍കണമെന്നും സര്‍ക്കാരിന് അയച്ച കത്തില്‍ ഇവര്‍ ആവശ്യപ്പെട്ടു. ഫ്‌ളാറ്റ് ഒഴിയുന്നതിനു മുന്‍പ് കണക്കെടുപ്പ് പൂര്‍ത്തിയാക്കണമെന്നും കത്തില്‍ ആവശ്യപ്പെട്ടിട്ടുണ്ട്.

എന്നാല്‍ ബലം പ്രയോഗിച്ചു ഒഴിപ്പിക്കാന്‍ ശ്രമിച്ചാല്‍ നടക്കില്ല. അതിനാണ് ശ്രമമെങ്കില്‍ നാളെ മുതല്‍ നിരാഹാര സമരം ആരംഭിക്കും. വൈദ്യുതി പുനസ്ഥാപിച്ചു തന്നെങ്കില്‍ മാത്രമേ ഫ്‌ളാറ്റില്‍ നിന്നുള്ള സാധനങ്ങള്‍ പുറത്തിറക്കാനാവൂ. പല വീട്ടു സാധനങ്ങളും മുകളിലെ നിലകളില്‍ നിന്നിറക്കാനാവില്ല. അതിനു ലിഫ്റ്റുതന്നെ വേണം. ഇതൊക്കെ താഴത്തേക്കെത്തിക്കുക എന്നത് പെട്ടെന്നു പൂര്‍ത്തീകരിക്കാനാവില്ല. ദിവസങ്ങളെടുക്കും. ഇതിനാണ് കൂടുതല്‍ സമയം അനുവദിക്കണമെന്നാവശ്യപ്പെടുന്നത്.
നഷ്ടപരിഹാരത്തുക പെട്ടെന്നു കിട്ടിയെങ്കിലേ താമസത്തിന് ബദല്‍ സംവിധാനം കണ്ടെത്താനുമാവൂ എന്നുമാണ് ഫ്‌ളാറ്റുടമകള്‍ ആവശ്യപ്പെടുന്നത്.