റിയാദ്: ടെല്ലര്‍ വഴി നാട്ടിലേക്ക് പണമയക്കാനെത്തിയ മലയാളി തട്ടിപ്പിനിരയായി. റിയാദ് സുലൈയില്‍ കമ്പനി ജീവനക്കാരനായ തൃശ്ശൂര്‍ ഇടവഴിക്കല്‍ അബ്ദുല്‍ ജലീലിന് ഇതുവഴി നൊടിയിടയില്‍ നഷ്ടപ്പെട്ടത് അയ്യായിരം റിയാലാണ്. സുലൈയില്‍ തന്നെയുള്ള അല്‍ റാജ്ഹി ബാങ്കിന്റെ ടെല്ലറിലാണ് ജലീല്‍ പണമയക്കാനെത്തിയത്. പണമയക്കുന്നിനിടയില്‍ തൊട്ട് പിറകിലുണ്ടായ അറബ് വംശജന്‍ നിരന്തരം ധൃതി കാട്ടിയത് കാരണം പണമയച്ച ഉടനെ ജലീല്‍ മാറികൊടുക്കുകയായിരുന്നു.

കാര്‍ഡെടുക്കാന്‍ മറന്ന ജലീലിന് അറബ് വംശജനായിരുന്നു ടെല്ലറില്‍ നിന്നു കാര്‍ഡെടുത്ത് കൊടുത്തതത്രെ. വീണ്ടും ക്യൂവില്‍ നിന്ന ജലീല്‍ നാട്ടിലേക്ക് പണമയക്കുന്നതിന് വേണ്ടി കാര്‍ഡ് മെഷീനിലിട്ട് പാസ് വേര്‍ഡ് അടിച്ചപ്പോള്‍ പാസ്‌വേര്‍ഡ് തെറ്റാണെന്ന മെസ്സേജാണ് വന്നത്. പല തവണ ശ്രമിച്ചിട്ടും അതേ സന്ദേശം തന്നെയാണ് ലഭിച്ചത്. പിന്നീട് കാര്‍ഡ് പരിശോധിച്ചപ്പോഴാണ് അത് മറ്റൊരാളുടെ കാര്‍ഡാണെന്ന് മനസിലായത്. ഇതിനിടയില്‍ അറബ് വംശജന്‍ എ.ടി.എം കൗണ്ടറില്‍ നിന്ന് ഇറങ്ങിപ്പോയിരുന്നു. മൊബൈല്‍ പരിശോധിച്ചപ്പോഴാണ് താന്‍ ചതിയില്‍പ്പെട്ടതാണെന്ന് ജലീലിന് ബോധ്യമായത്. 5000 റിയാല്‍ അക്കൗണ്ടില്‍ നിന്നും പിന്‍വലിച്ചതായുള്ള എസ്.എം.എസ് സന്ദേശമായിരുന്നു മൊബൈലില്‍ കാണാനായത്. തുടര്‍ന്ന് പരിസരത്ത് അറബ് വംശജനെ തെരഞ്ഞെങ്കിലും കണ്ടെത്താനായില്ല.

ടെല്ലറില്‍ ക്രയവിക്രയം നടത്തുമ്പോള്‍ പിന്നിലിരുന്ന് പാസ്‌വേര്‍ഡ് മനസ്സിലാക്കിയ ആ വ്യക്തി ജലീലിനെ നിരന്തരം ശല്യം ചെയ്ത് കാര്‍ഡ് കൈക്കലാക്കി പകരം മറ്റൊരാളുടെ കാര്‍ഡ് നല്‍കുകയായിരുന്നു. ഇതിനിടയില്‍ കിട്ടിയ കാര്‍ഡ് പരിശോധിക്കാതെ ജലീല്‍ മാറി നില്‍ക്കുകയും ജലീലിന്റെ ഒറിജിനല്‍ കാര്‍ഡ് ഉപയോഗിച്ച് മനസ്സില്‍ കുറിച്ചുവച്ച പാസ്‌വേര്‍ഡ് ഉപയോഗിച്ച് 5000 റിയാല്‍ പിന്‍വലിക്കുയുമായിരുന്നു.