മാനന്തവാടി: കഴിഞ്ഞ ദിവസം തവിഞ്ഞാല്‍ പഞ്ചായത്തില്‍ ഇറങ്ങിയ കാട്ടുപോത്ത് വനപാലകരെ വട്ടംകറക്കുന്നു. തിങ്കളാഴ്ച വൈകിട്ട് ഈ പോത്തിനെ വെണ്‍മണിക്ക് സമീപമുള്ള വനത്തിലേക്ക് കയറ്റിവിട്ടെങ്കിലും ഇന്നലെ രാവിലെ തൊണ്ടര്‍നാട് പഞ്ചായത്തിലെ പുതുശ്ശേരി അങ്ങാടിയില്‍ വീണ്ടും ഇറങ്ങുകയായിരുന്നു. പുതുശ്ശേരി അങ്ങാടിയോട് ചേര്‍ന്ന പള്ളി വാതുക്കല്‍ ബൈജുവിന്റെ റബ്ബര്‍ തോട്ടത്തിലാണ് കാട്ടിയെ നാട്ടുകാര്‍ കണ്ടത്.
ജനങ്ങള്‍ കൂടിയതോടെ പോത്ത് തൊട്ടടുത്ത സെന്റ് മേരീസ് പള്ളിയുടെ തേയില തോട്ടത്തിലേക്ക് മാറിനിലയുറപ്പിച്ചു. കാട്ടുപോത്തിനെ കുഞ്ഞോം വനമേഖലയിലേക്ക് തുരത്താനുള്ള ശ്രമം വനം വകുപ്പ് തുടരുകയാണ്. കൈക്ക് പരുക്കേറ്റതിനാല്‍ നടക്കാന്‍ വിഷമമുള്ളതായും വനം വകുപ്പ് ജീവനക്കാര്‍ പറഞ്ഞു. എന്നാല്‍ ജനങ്ങള്‍ തടിച്ചുകൂടി നില്‍ക്കുന്നതിനാല്‍ തുരത്താനുള്ള ശ്രമത്തെ ബാധിക്കുന്നതായും അധികൃതര്‍ പറഞ്ഞു.