തൃശൂര്‍: അട്ടപ്പാടി വനത്തില്‍ നടന്ന ഏറ്റുമുട്ടലില്‍ കൊല്ലപ്പെട്ട നാല് മാവോയിസ്റ്റുകളില്‍ ഒരാള്‍ ചെന്നൈ സ്വദേശി ശ്രീനിവാസനാണെന്ന് ബന്ധുക്കള്‍. മൃതദേഹം ഇവര്‍ തിരിച്ചറിഞ്ഞു. മാവോയിസ്റ്റ് അരവിന്ദന്‍ എന്ന പേരില്‍ പൊലിസ് സൂക്ഷിച്ച മൃതദേഹമാണ് ശ്രീനിവാസന്റേതെന്ന് തിരിച്ചറിഞ്ഞിരിക്കുന്നത്.

ചെന്നൈയില്‍ നിന്നെത്തിയ സഹോദരങ്ങളാണ് മൃതദേഹം തിരിച്ചറിഞ്ഞത്. എട്ട് വര്‍ഷം മുന്‍പ് വീടും നാടും ഉപേക്ഷിച്ച് പോയ ശ്രീനിവാസനെ കുറിച്ച് ബന്ധുക്കള്‍ക്ക് കൃത്യമായ അറിവുണ്ടായിരുന്നില്ല. ചെന്നൈയില്‍ സിപിഎം പ്രവര്‍ത്തകനായിരുന്നു ഇയാളെന്നാണ് ബന്ധുക്കള്‍ പൊലിസിനു നല്‍കിയിരിക്കുന്ന വിവരം.

മൃതദേഹം ശ്രീനിവാസന്റേത് തന്നെയാണെന്ന് ഉറപ്പാക്കാന്‍ ശാസ്ത്രീയ പരിശോധനകള്‍ ആവശ്യമാണ്. വ്യക്തത വരുത്താന്‍ ഡി.എന്‍.എ പരിശോധന നടത്താനാണ് പൊലീസ് നീക്കം. ഇതിനായി സഹോദരങ്ങളെന്ന് അവകാശപ്പെട്ട രണ്ട് പേരുടെയും രക്തം ശേഖരിച്ചിട്ടുണ്ട്.