കൊണ്ടോട്ടി: കരിപ്പൂര്‍ വിമാനത്താവളത്തില്‍ ഗള്‍ഫില്‍ നിന്നെത്തിയ മൂന്ന് യാത്രക്കാരില്‍നിന്ന് 92 ലക്ഷത്തിന്റെ സ്വര്‍ണം എയര്‍ കസ്റ്റംസ് ഇന്റലിജന്‍സ് പിടികൂടി. ജിദ്ദയില്‍ നിന്നെത്തിയ മലപ്പുറം വണ്ടൂര്‍ പള്ളിക്കുന്ന് കുറ്റിയാളി പുല്ലത്ത് നിയാസ്, അബൂദബിയില്‍ നിന്നെത്തിയ കാസര്‍കോട് ബട്കല്‍ സ്വദേശി അഹമ്മദ് ഇര്‍ഷാദ്, കോഴിക്കോട് കൊടുവള്ളി സ്വദേശി നാറൂക്കോല്‍ മുഹമ്മദ് ഷഫീഖ് എന്നിവരില്‍ നിന്നാണ് സ്വര്‍ണം പിടികൂടിയത്.
സ്‌പൈസ് ജെറ്റ് വിമാനത്തിലാണ് നിയാസ് ജിദ്ദയില്‍ നിന്നെത്തിയത്. എമര്‍ജന്‍സി ലാംപിനകത്ത് ഒളിപ്പിച്ച 1,398 ഗ്രാം സ്വര്‍ണമാണ് ഇയാള്‍ കടത്താന്‍ ശ്രമിച്ചത്. സ്വര്‍ണം കനം കുറഞ്ഞ 24 പാളികളാക്കി എമര്‍ജന്‍സി ലാംപിന്റെ ബാറ്ററിയുടെ സ്ഥാനത്ത് ഒളിപ്പിച്ച നിലയിലായിരുന്നു. ഇവക്ക് മാര്‍ക്കറ്റില്‍ 48 ലക്ഷം രൂപ വില ലഭിക്കും. അബൂദബിയില്‍നിന്ന് ഇത്തിഹാദ് എയര്‍ വിമാനത്തില്‍ എത്തിയ അഹമ്മദ് ഇര്‍ഷാദ് 666 ഗ്രാം സ്വര്‍ണം ബാഗേജിലെ വസ്ത്രങ്ങള്‍ക്കിടയില്‍ ഒളിപ്പിച്ചാണ് കൊണ്ടുവന്നത്. സ്വര്‍ണ ബിസ്‌ക്കറ്റുകളും സ്വര്‍ണമാലയുമാണ് ഇയാളില്‍നിന്ന് കണ്ടെടുത്തത്. ഇവക്ക് 22 ലക്ഷം രൂപ വില ലഭിക്കും. അബൂദബിയില്‍ നിന്ന് ഇത്തിഹാദ് വിമാനത്തില്‍ കരിപ്പൂരിലെത്തിയ ഷഫീഖിനെ 885 ഗ്രാം സ്വര്‍ണ മിശ്രിതവുമായാണ് പിടികൂടിയത്. ഇത് അടിവസ്ത്രത്തിനുള്ളില്‍ ഒളിപ്പിച്ച നിലയിലായിരുന്നു. മിശ്രിതത്തില്‍നിന്ന് 22 ലക്ഷത്തിന്റെ 665 ഗ്രാം സ്വര്‍ണമാണ് വേര്‍തിരിച്ചെടുത്തത്.