പയ്യന്നൂര്‍: രാമന്തളി ചിറ്റടിയില്‍ വീണ്ടും ബോംബ് സ്‌ഫോടനം. തിങ്കളാഴ്ച രാത്രി അര്‍ധ രാത്രിയോടെ ഉഗ്രസ്‌ഫോടനമുണ്ടായത്. തളിപ്പറമ്പ് ഡിവൈ.എസ്.പി കെ.വി വേണുഗോപാലിന്റ നേതൃത്വത്തിലുള്ള സംഘം സ്ഥലത്തെത്തി. അതേസമയം തുടര്‍ച്ചയായുണ്ടാകുന്ന ബോംബ് സ്‌ഫോടനങ്ങള്‍ക്കെതിരേ നടപടി സ്വീകരിക്കാത്തതില്‍ പൊലിസിനെതിരേ കടുത്ത പ്രതിഷേധമാണ് ഉയരുന്നത്.
ഇതിനിടെ ഇന്നലെ വൈകിട്ട് ഏഴോടെ ചിറ്റടി പുതിയ ഭഗവതി ക്ഷേത്രത്തിന് സമീപത്ത് നിര്‍മാണം നടന്നുകൊണ്ടിരിക്കുന്ന ആര്‍.എസ്.എസ് കാര്യാലയത്തിനടുത്തായി സ്റ്റീല്‍ ബോംബ് കണ്ടെത്തി. പയ്യന്നൂര്‍ എസ്.ഐ കെ.പി ഷൈനും സംഘവും കണ്ണൂരില്‍നിന്ന് ബോംബ് സ്‌ക്വാഡ് എസ്.ഐ ടി.വി ശശിധരനും സംഘവും സ്ഥലത്തെത്തി ബോംബ് നിര്‍വീര്യമാക്കി.
നേരത്തെ ബോംബ് സ്‌ഫോടനം നടന്ന കക്കംപാറയില്‍ ബോംബ് സ്‌ക്വാഡും ഡോഗ് സ്‌ക്വാഡും നടത്തിയ റെയ്ഡില്‍ ഒരുസ്റ്റീല്‍ ബോംബ് കണ്ടെടുത്ത് നിര്‍വീര്യമാക്കിയിരുന്നു.