തിരുവനന്തപുരം: രഞ്ജി ട്രോഫി ക്രിക്കറ്റില്‍ മധ്യപ്രദേശിനെതിരേ കേരളം ഇന്നിങ്‌സ് തോല്‍വിയുടെ വക്കില്‍. ആദ്യ ഇന്നിങ്‌സില്‍ 63 റണ്‍സിന് കേരളത്തെ ചുരുട്ടിക്കൂട്ടിയ മധ്യപ്രദേശ് 328 റണ്‍സ് നേടി. ഒന്നാം ഇന്നിങ്‌സില്‍ 265 റണ്‍സിന്റെ ലീഡ് നേടിയ മധ്യപ്രദേശ് രണ്ടാം ഇന്നിങ്‌സിലും കേരളത്തെ വരിഞ്ഞുമുറുക്കി. രണ്ടാം ഇന്നിങ്‌സിലും കേരളത്തിന്റെ ബാറ്റിങ് നിര തകര്‍ന്ന് അടിയുകയാണ്.
34 റണ്‍സ് എടുക്കുന്നതിനിടെ കേരളത്തിന്റെ നാലു മുന്‍നിര ബാറ്റ്‌സ്മാന്‍മാര്‍ പവലിയനിലേക്ക് മടങ്ങി. ആറു വിക്കറ്റ് മാത്രം ബാക്കി നില്‍ക്കേ കേരളത്തിന് ഇന്നിങ്‌സ് തോല്‍വി ഒഴിവാക്കാന്‍ 231 റണ്‍സ് കണ്ടെത്തണം.
രണ്ടാം ഇന്നിങ്‌സില്‍ ജലജ് സക്‌സേനയ്ക്ക് നേടാനായത് ഒറു റണ്‍സ് മാത്രം. 20 റണ്‍സോടെ സച്ചിന്‍ ബേബിയും ഒന്‍പത് റണ്‍സോടെ വി.എ ജഗദീഷുമാണ് ക്രീസില്‍. സ്‌കോര്‍ ബോര്‍ഡില്‍ നാല് റണ്‍സ് ചേര്‍ക്കുന്നതിനിടെ ഓപ്പണര്‍ കെ.ബി അരുണ്‍ കാര്‍ത്തികിനെ കുല്‍ദീപ് സെന്‍ ബൗള്‍ഡാക്കി. തൊട്ടുപിന്നാലെ പൂജ്യനായി രോഹന്‍ പ്രേമും മടങ്ങി. രോഹനെ കുല്‍ദീപ് എല്‍.ബി.ഡബ്ല്യുവില്‍ കുരുക്കി. രണ്ട് റണ്ണെടുത്ത അക്ഷയ് ചന്ദ്രനെ ആവേഷ് ഖാന്റെ പന്തില്‍ നമന്‍ ഓജ പിടിച്ചു പുറത്താക്കി. കേരളത്തിന്റെ സ്‌കോര്‍ വെറും എട്ടു റണ്ണില്‍ നില്‍ക്കേ ജലജ് സക്‌സേനയും കൂടാരം കയറി.