തിരുവനന്തപുരം: സര്‍ക്കാര്‍ ഭൂമി കൈയേറിയാല്‍ തടവ് ശിക്ഷ ഉറപ്പുവരുത്തുന്ന നിയമം കര്‍ശനമാക്കാന്‍ സര്‍ക്കാര്‍. കേരള ഭൂസംരക്ഷണ നിയമത്തിലെ ഏഴ് (എ) വകുപ്പ് പ്രകാരം കുറ്റംചുമത്തി കേസെടുക്കാന്‍ പൊലിസ് സ്റ്റേഷനില്‍ റിപ്പോര്‍ട്ട് ചെയ്യുന്നത് നിര്‍ബന്ധമാക്കി സര്‍ക്കാര്‍ ഉത്തരവിറക്കി. കൈയേറ്റം സംബന്ധിച്ച നടപടികള്‍ സ്വീകരിക്കുന്നതിന് മേല്‍നോട്ടം വഹിക്കാന്‍ രൂപീകരിച്ച മോണിറ്ററിങ് സെല്ലിനായിരിക്കും ചുമതല.
നേരത്തെ നിയമം പ്രാബല്യത്തിലുണ്ടെങ്കിലും അത് കര്‍ശനമായി പാലിക്കപ്പെട്ടിരുന്നില്ല. സര്‍ക്കാര്‍ ഭൂമി കൈയേറിയതായി കണ്ടെത്തിയാല്‍ റവന്യൂ ഉദ്യോഗസ്ഥര്‍ കൈയേറ്റക്കാര്‍ക്ക് ഒഴിപ്പിക്കല്‍ നോട്ടിസ് നല്‍കുന്നതിനൊപ്പം പൊലിസിനെ അറിയിച്ച് ക്രിമിനല്‍ കേസും എടുപ്പിക്കണം. കൂടാതെ മോണിറ്ററിങ് സെല്ലിനെയും അറിയിക്കണം. ഇതു വീഴ്ച വരുത്തിയാല്‍ ഉദ്യോഗസ്ഥര്‍ക്കെതിരേ നടപടി സ്വീകരിക്കുമെന്നും ഉത്തരവില്‍ പറയുന്നു. നിലവിലെ നിയമത്തില്‍ വ്യവസ്ഥകള്‍ ഉണ്ടെങ്കിലും പൊലിസില്‍ അറിയിക്കാന്‍ റവന്യൂ ഉദ്യോഗസ്ഥര്‍ വീഴ്ച വരുത്തിയിരുന്നു. അത് ഒഴിവാക്കാനാണ് പുതിയ നിര്‍ദേശം. ഭൂമി കൈയേറിയതായി കണ്ടെത്തി റവന്യൂ ഉദ്യോഗസ്ഥര്‍ മോണിറ്ററിങ് സെല്ലിനെ അറിയിച്ചാല്‍ സെല്‍ അടിയന്തര നടപടികളെടുക്കണം. സര്‍ക്കാരിന്റെ ഇടപെടല്‍ ആവശ്യമായി വരുന്ന കേസുകളുണ്ടെങ്കില്‍ അക്കാര്യം സര്‍ക്കാരിലേക്ക് റിപ്പോര്‍ട്ട് ചെയ്യണമെന്ന് മോണിറ്ററിങ് സെല്ലിനും നിര്‍ദേശം നല്‍കിയിട്ടുണ്ട്.
സര്‍ക്കാര്‍ ഭൂമി അനധികൃതമായി കൈവശം വയ്ക്കുന്നത് അഞ്ചു വര്‍ഷം വരെ തടവും 50,000 രൂപാ മുതല്‍ രണ്ടുലക്ഷം വരെ പിഴയും ഈടാക്കാവുന്ന ജാമ്യം കിട്ടാത്ത കുറ്റമാണ്. സെറ്റില്‍മെന്റ് രജിസ്റ്റര്‍ പ്രകാരമോ റീസര്‍വേ റെക്കോര്‍ഡ് പ്രകാരമോ സര്‍ക്കാര്‍ ഭൂമി ആണെങ്കില്‍ കൈയേറ്റക്കാരന് കോടതിയില്‍ പോകാനും പറ്റില്ല. ഇതിന് വില്ലേജ് ഒഫിസര്‍ സാക്ഷ്യപ്പെടുത്തിയാല്‍ മതി. നഷ്ടപരിഹാരം തഹസില്‍ദാര്‍ക്ക് തന്നെ ഈടാക്കാം.