കാഞ്ഞങ്ങാട്: ഈ വര്‍ഷത്തെ ഹജ്ജ് കര്‍മത്തിന് സംസ്ഥാന ഹജ്ജ് കമ്മിറ്റി മുഖേന യാത്ര പുറപ്പെടുന്ന കാസര്‍കോട് ജില്ലയില്‍നിന്നുള്ള ഹജ്ജാജിമാര്‍ക്കുള്ള കുത്തിവയ്പ്പ് കാഞ്ഞങ്ങാട് ജില്ലാ ആശുപത്രിയില്‍ വച്ച് നടന്നു. മെനിഞ്ചൈറ്റിസ്, സീസണല്‍ ഇന്‍ഫ്‌ലുവെന്‍സ്, ഓറല്‍ പോളിയോ വാക്‌സിന്‍ എന്നിവ നല്‍കി. കാഞ്ഞങ്ങാട്, ഉദുമ മണ്ഡലങ്ങളിലെയും നീലേശ്വരം മുനിസിപ്പാലിറ്റിയിലെയും ഹജ്ജാജിമാര്‍ക്കുള്ള കുത്തിവെപ്പാണ് കാഞ്ഞങ്ങാട് ജില്ലാ ആശുപത്രിയില്‍ വച്ചു നല്‍കിയത്.
ഡെപ്യൂട്ടി ഡി.എം.ഒ ഡോ. വിമല്‍രാജ്, ജില്ലാ ആശുപത്രി സൂപ്രണ്ട് ഡോ. സുനിത, ജില്ലാ ട്രെയിനര്‍ എന്‍.പി സൈനുദ്ധീന്‍, ഹജ്ജ് വെല്‍ഫെയര്‍ ഫോറം ജില്ലാ പ്രസിഡന്റ് പി.എം ഹസ്സന്‍ ഹാജി, ഭാരവാഹികളായ എ അബ്ദുല്ല, പി.എം കുഞ്ഞബ്ദുള്ള ഹാജി, കെ.എച്ച് മുഹമ്മദ് കുഞ്ഞി ഹാജി, ട്രെയിനര്‍മാരായ ഹമീദ് ഹാജി കോട്ടിക്കുളം, ഇ.എം.കുട്ടി ഹാജി, അബ്ദു സത്താര്‍, മുനീര്‍ എം.കെ, എം.ഇബ്രാഹിം, നസീറ എം.പി, സൗദ ടി.കെ.പി, സുബൈര്‍ ഇ എന്നിവര്‍ നേതൃത്വം നല്‍കി. ഹജ്ജാജിമാര്‍ക്കുള്ള മൂന്നാംഘട്ട പരിശീലന പരിപാടി ഉദുമ മണ്ഡലത്തില്‍ നിന്നുള്ളവര്‍ക്ക് ആഗസ്റ്റ്14ന് ഞായര്‍ രാവിലെ ഒന്‍പതിന് കോട്ടിക്കുളം മദ്‌റസ ഹാളില്‍ വച്ചും കാഞ്ഞങ്ങാട് മണ്ഡലം നീലേശ്വരം മുനിസിപ്പാലിറ്റി എന്നീ ഭാഗങ്ങളിലുള്ളവര്‍ക്കു 15ന് തിങ്കളാഴ്ച ഉച്ചക്ക് 1.30 ന് ഹോസ്ദുര്‍ഗ് ടൗണ്‍ മദ്‌റസ ഹാളില്‍ വച്ചും നടക്കും. ജില്ലാ ട്രെയിനര്‍ എന്‍.പി സൈനുദ്ധീന്‍ അറിയിച്ചു.