മുക്കം: കാരശ്ശേരി പഞ്ചായത്ത് നടപ്പാക്കിയ 'സുസ്ഥിരം' പദ്ധതി പ്രകാരം വാര്‍ഡുതലത്തില്‍ തിരഞ്ഞെടുക്കപ്പെട്ടവര്‍ക്കായി ഏകദിന ശില്‍പശാല സംഘടിപ്പിക്കുന്നു. ക്ഷീരമേഖലയിലും ഇറച്ചി, മുട്ട, തേന്‍ ഉല്‍പ്പാദനത്തിലും സ്വയം പര്യാപ്തത ലക്ഷ്യമിട്ടുള്ളതാണ് പദ്ധതി.

ശില്‍പശാല നാളെ കാരശ്ശേരി ബാങ്ക് ഓഡിറ്റോറിയത്തില്‍ നടക്കുമെന്ന് പഞ്ചായത്ത് പ്രസിഡന്റ് വി.കെ വിനോദ് വാര്‍ത്താസമ്മേളനത്തില്‍ അറിയിച്ചു. പഞ്ചായത്തിലെ തൊഴിലില്ലായ്മക്കു പരിഹാരം കാണാനും ഓരോ കുടുംബത്തിനും സുസ്ഥിര വരുമാനവുമാണ് പദ്ധതി ലക്ഷ്യമിടുന്നത്.
ഇതുപ്രകാരം പഞ്ചായത്തിലെ സന്നദ്ധരായവര്‍ക്കെല്ലാം പശുവളര്‍ത്തുന്നതിനും ഫാമുകള്‍ തുടങ്ങുന്നതിനും സാമ്പത്തിക സഹായം നല്‍കും. മൃഗസംരക്ഷണ വകുപ്പിന്റെയും ജില്ലാ സഹകരണ ബാങ്കിന്റെയും സഹകരണത്തോടെയാണ് പദ്ധതി നടപ്പാക്കുന്നത്. ഉല്‍പ്പാദിപ്പിക്കുന്ന ഉല്‍പ്പന്നങ്ങള്‍ക്ക് പഞ്ചായത്തില്‍ തന്നെ വിപണി കണ്ടെത്തുന്നതിന് മാര്‍ക്കറ്റിങ് സൊസൈറ്റിയും പഞ്ചായത്ത് ലക്ഷ്യമിടുന്നു.
നിലവില്‍ സംസ്ഥാനത്ത് ഏറ്റവുമധികം തേന്‍ കര്‍ഷകരുള്ള പഞ്ചായത്താണ് കാരശ്ശേരി. എന്നാല്‍ ഇവിടെ ഉല്‍പ്പാദിപ്പിക്കുന്ന തേന്‍ സംസ്ഥാനത്തെ മറ്റു സ്ഥലങ്ങളിലെത്തിച്ച് വില്‍പ്പന നടത്തുകയാണ് പതിവ്. ഇതിനു മാറ്റം വരുത്തി മുഴുവന്‍ തേനീച്ച കര്‍ഷകരുമായി സഹകരിച്ച് കാരശ്ശേരി ബ്രാന്‍ഡ് തേന്‍ വിപണിയിലിറക്കുമെന്ന് പഞ്ചായത്ത് പ്രസിഡന്റ് വി.കെ വിനോദ് പറഞ്ഞു. വാര്‍ത്താ സമ്മേളനത്തില്‍ വി.കെ വിനോദ്, വി.പി ജമീല, അബ്ദുല്ല കുമാരനെല്ലൂര്‍, സജി തോമസ്, വെറ്റിനറി ഡോക്ടര്‍ പി.പി മുജീബ് റഹ്മാന്‍ എന്നിവര്‍ പങ്കെടുത്തു.