നാദാപുരം: അനധികൃത നിര്‍മാണം നടത്തിയെന്ന പരാതിയെത്തുടര്‍ന്ന് സ്റ്റോപ്പ് മെമ്മോ നല്‍കിയ സ്ഥലത്ത് വീണ്ടും നിര്‍മാണ പ്രവര്‍ത്തനം. പഞ്ചായത്ത് തടഞ്ഞിട്ടും നിര്‍മാണം നടത്തിയ ഭാഗം പൊളിച്ചു മാറ്റണമെന്ന ആവശ്യവുമായി നാട്ടുകാര്‍ രംഗത്തെത്തി.
നാദാപുരം താലൂക്ക് ആശുപത്രി പരിസരത്തെ പൊതു വഴിയാണ് കെട്ടിട ഉടമകള്‍ കൈയേറിയതായി പഞ്ചായത്തില്‍ മാസങ്ങള്‍ക്കു മുന്‍പ് പരാതി ലഭിച്ചത്. ഇതേ തുടര്‍ന്ന് പഞ്ചായത്ത് ഭരണസമിതി സ്ഥലത്ത് പരിശോധന നടത്തി നിര്‍മാണ പ്രവര്‍ത്തനം നിര്‍ത്തി വയ്ക്കാന്‍ നോട്ടിസ് നല്‍കുകയായിരുന്നു.
ഇവിടെയാണ് കഴിഞ്ഞ ദിവസം ചെങ്കല്‍ ഉപയോഗിച്ച് പുതിയ മതില്‍ നിര്‍മിച്ചു മണ്ണിട്ട് നികത്തിയിരിക്കുന്നത്. ഒരു മീറ്ററോളം വീതിയില്‍ സ്ഥലത്തെ ഭൂമി മണ്ണിട്ട് നികത്തിയ നിലയിലാണിപ്പോള്‍.
പരിസരത്തെ നിരവധി ആളുകള്‍ താലൂക്ക് ആശുപത്രിയിലേക്കും മെയിന്‍ റോഡിലേക്കും എത്താനായി ഉപയോഗിക്കുന്ന വഴിയാണ് കൈയേറിയിരിക്കുന്നതെന്നാണ് ആക്ഷേപം.