സാന്‍ഫ്രാന്‍സിസ്‌കോ: ഗൂഗിളില്‍ ലിംഗ സമത്വം ആവശ്യമില്ലെന്ന കുറിപ്പ് എഴുതി വിവാദത്തിലായ ഉദ്യോഗസ്ഥനെ കമ്പനി പുറത്താക്കി. ഗൂഗിളിന്റെ ആസ്ഥാനത്ത് സോഫ്റ്റ്‌വെയര്‍ എന്‍ജിനീയറായിരുന്ന ജെയിംസ് ഡമോറെ ആണ് പുറത്താക്കപ്പെട്ടത്.
കമ്പനിയിലെ ലൈംഗിക, സാമൂഹിക ന്യൂനപക്ഷങ്ങളുടെ ശാക്തീകരണത്തിനായി നടപ്പാക്കുന്ന പദ്ധതികളെ വിമര്‍ശിച്ചുകൊണ്ടുള്ള ഡമോറെയുടെ സ്വകാര്യ കുറിപ്പ് ഗുഗിളിനകത്തുതന്നെ വലിയ വിമര്‍ശനത്തിനു വഴിവച്ചിരുന്നു. സംഭവം പുറത്തായതിനു പിറകെ വ്യാപക പ്രതിഷേധമുയര്‍ന്നതോടെയാണ് ഉദ്യോഗസ്ഥനെ കമ്പനി പിരിച്ചുവിട്ടത്. നേരത്തെ കമ്പനിയില്‍ അഭിപ്രായ സ്വാതന്ത്ര്യമുണ്ടെന്നു പറഞ്ഞ് ഉദ്യോസ്ഥനെ അധികൃതര്‍ ന്യായീകരിച്ചിരുന്നെങ്കിലും പിന്നീട് ഗൂഗിള്‍ സി.ഇ.ഒ സുന്ദര്‍ പിച്ചയുടെ കൂടി ഇടപെടലിനെ തുടര്‍ന്ന് നടപടിയെടുക്കുകയായിരുന്നു. ഐ.ടി രംഗത്ത് സ്ത്രീ സാന്നിധ്യം കുറയാനുള്ള കാരണം ജോലിസ്ഥലത്തെ പക്ഷപാതിത്വമോ വിവേചനമോ അല്ല. പകരം ആണും പെണ്ണും തമ്മിലുള്ള ശരീരിക മാനസിക പ്രത്യേകതകളാണെന്നായിരുന്നു ഡമോറെയുടെ വാദം. ഐഡിയോളജിക്കല്‍ എക്കോ ചേമ്പര്‍ എന്ന് പേരിട്ട കുറിപ്പിലാണ് ഗൂഗിളിലെ നടപടികളെ അദ്ദേഹം വിമര്‍ശിച്ചത്.