ആലപ്പുഴ: പുന്നമടക്കായലില്‍ അരങ്ങേറിയ നെഹ്‌റു ട്രോഫി വള്ളംകളിയില്‍ ഗബ്രിയേല്‍ ചുണ്ടന്‍ ജലരാജാക്കന്മാരായി. ഇത് ആദ്യമായാണ് ഗബ്രിയേല്‍ നെഹ്‌റു ട്രോഫിയില്‍ മുത്തമിടുന്നത്. നീറ്റിലിറക്കിയ വര്‍ഷം തന്നെ കിരീടം നേടി ചരിത്രം കുറിച്ചിരിക്കുകയാണ് ഗബ്രിയേല്‍.

വാശിയേറിയ മത്സരത്തില്‍ ഫോട്ടോഫിനിഷിലൂടെയാണ് വിജയിയെ നിശ്ചയിച്ചത്. പായിപ്പാട് ചുണ്ടനെയും കാരിച്ചാലിനെയും മഹാദേവികാടിനെയും പിന്നിലാക്കിയാണ് ഗബ്രിയേല്‍ ഒന്നാം സ്ഥാനം കരസ്ഥമാക്കിയത്.

മത്സരത്തില്‍ എറണാകുളത്തെ തുരുത്തിപ്പുറം ബോട്ട് ക്ലബ്ബ് ആണ് ഗബ്രിയേല്‍ തുഴഞ്ഞത്. മഹാദേവികാട് രണ്ടും പായിപ്പാട് മൂന്നും കാരിച്ചാല്‍ നാലാം സ്ഥാനത്തെത്തി. 4.17.42 മിനുറ്റില്‍ ഗബ്രിയേല്‍ ഫിനിഷ് ചെയ്‌തെങ്കില്‍ രണ്ടാം സ്ഥാനത്തെത്തിയ മഹാദേവികാട് 4.17.72 മിനുറ്റിലാണ് ഫിനിഷ് ചെയ്തത്.