ചെറുതോണി: നിയന്ത്രണം വിട്ട് കാര്‍ നിര്‍ത്തിയിട്ടിരുന്ന ഓട്ടോറിക്ഷയിലും മുന്നില്‍ പോയ ബൈക്കിലും വഴിയാത്രക്കാരിയേയും ഇടിച്ച് തെറിപ്പിച്ചു. മൂന്ന് പേര്‍ക്ക് പരുക്കേറ്റു. രണ്ട് പേരുടെ നില ഗുരുതരം.
ഇന്നലെ വൈകിട്ട് 5.20 ഓടെ ചെറുതോണി  - കട്ടപ്പന റോഡില്‍ ആലുംചുവടിന് സമീപത്തായിരുന്നു അപകടം. അപകടത്തില്‍ ഓട്ടോറിക്ഷ ഡ്രൈവര്‍ വാഴത്തോപ്പ് നെല്ലിപ്പുഴയില്‍ മാത്യു(50),വഴിയാത്രക്കാരി അങ്കണവാടി ടീച്ചര്‍ ചെറുതോണി  മുല്ലത്ത് വളപ്പില്‍ ആയിഷ(46)എന്നിവര്‍ക്കാണ് ഗുരുതരമായി പരുക്കേറ്റത്.
ഇവരെ ജില്ലാ ആശുപത്രിയില്‍ പ്രാഥമിക ചികില്‍സ നല്‍കിയതിന് ശേഷം കോട്ടയം മെഡിക്കല്‍ കോളജിലേക്ക് മാറ്റി. സാരമായി പരുക്കേറ്റ ബൈക്ക് യാത്രക്കാരന്‍ നാരക്കാനം സ്വദേശി കല്ലുംകൂട്ടത്തില്‍ റോയി(40)യെ ജില്ലാ ആശുപത്രിയില്‍ പ്രവേശിപ്പിച്ചു, ഇടുക്കിയില്‍ നിന്ന് ചെറുതോണിക്ക് വരുകയായിരുന്ന കാര്‍ നിയന്ത്രണം വിട്ട് റോഡരുകില്‍ നിര്‍ത്തിയിട്ടിരുന്ന ഓട്ടോറിഷയിലും റോഡിലൂടെ നടന്നു പോകുകയായിരുന്ന ആയിഷയേയും മുന്നില്‍ പോയ ബൈക്കിലും ഇടിക്കുകയായിരുന്നു. ഓട്ടോറിക്ഷ തകര്‍ന്നു റോഡില്‍ മലക്കംമറിഞ്ഞു.