നാറാത്ത്: ബസില്‍ കയറുന്നതിനിടെ വിദ്യാര്‍ഥിയെ ബസില്‍ നിന്ന് തള്ളിയിട്ടതായി പരാതി. ബസില്‍ നിന്ന് വീണ വിദ്യാര്‍ഥിയുടെ കൈക്ക് പരുക്കേറ്റു. അമൃത വിദ്യാലയത്തിലെ പത്താം ക്ലാസ് വിദ്യാര്‍ഥി കാക്കത്തുരുത്തിയിലെ അമൃതിനാണ് പരുക്കേറ്റത്. ഇന്നലെ രാവിലെ കാക്കത്തുരുത്തി ബസ്‌സ്റ്റോപ്പിലാണ് സംഭവം. സ്‌കൂളില്‍ പോകുന്നതിന് വേണ്ടി കാക്കത്തുരുത്തി ബസ്‌സ്റ്റോപ്പില്‍ നിന്ന് മയ്യില്‍-കണ്ണൂര്‍ റൂട്ടില്‍ ഓടുന്ന പ്രഗതി ബസില്‍ കുട്ടി കയറുന്നതിന് മുമ്പ് ബസിന്റെ ഡോര്‍ അടക്കുകയും കുട്ടി റോഡില്‍ വീഴുകയുമായിരുന്നു. ഇതിനെതുടര്‍ന്ന് ഇന്നലെ രാത്രി എട്ടു മണിക്ക് കാക്കത്തുരുത്തിയില്‍ നാട്ടുകാര്‍ ബസ് തടഞ്ഞുവെച്ച് ബസ് ജീവനക്കാരെ കൈയേറ്റം ചെയ്യാന്‍ ശ്രമം നടന്നു. പിന്നീട് പൊലിസ് എത്തിയാണ് നാട്ടുകാരെ ശാന്തരാക്കിയത്. രാവിലെ എട്ടുമണി മുതല്‍ ഒമ്പത്മണി വരെ കുട്ടികളെ കയറ്റാതെ ബസുകള്‍ അമിതവേഗതയില്‍ കടന്നു പോകുന്നതായി നാട്ടുകാര്‍ നേരത്തെ പൊലിസില്‍ പരാതിപ്പെട്ടിരുന്നു. ഇതിനെ തുടര്‍ന്ന് ബസ് ജീവനക്കാര്‍ക്ക് കഴിഞ്ഞ ദിവസം പൊലിസ് മുന്നറിയിപ്പും നല്‍കിയിരുന്നു.