നിലമ്പൂര്‍: കഴിഞ്ഞ ദിവസം അന്തരിച്ച ഡി.സി.സി സെക്രട്ടറി എം.എ റസാഖ് പ്രവര്‍ത്തിച്ച മേഖലകളിലെല്ലാം വ്യക്തിമുദ്ര പതിപ്പിച്ച നേതാവായിരുന്നുവെന്ന് മുന്‍മന്ത്രി ആര്യാടന്‍ മുഹമ്മദ്. നിലമ്പൂരില്‍ സംഘടിപ്പിച്ച സര്‍വകക്ഷി അനുസ്മരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. എല്ലാവരെയും ഒരുമിച്ച് കൊണ്ടുപോകുന്നതില്‍ റസാഖിന്റെ പാടവം എടുത്തുപറയേണ്ടതാണ്.
തികഞ്ഞ മതേതരവാദിയായിരുന്നു റസാഖെന്നും അദ്ദേഹം അനുസ്മരിച്ചു. നഗരസഭ ചെയര്‍പേഴ്‌സണ്‍ പത്മിനി ഗോപിനാഥ് അധ്യക്ഷയായി. ഡി.സി.സി പ്രസിഡന്റ് വി.വി പ്രകാശ്, കെ.പി.സി.സി സെക്രട്ടറി വി.എ കരീം, കെ.പി.സി.സി അംഗം ആര്യാടന്‍ ഷൗക്കത്ത്, വിവിധ രാഷ്ട്രീയ പാര്‍ട്ടി പ്രതിനിധികളായ ചീമാടന്‍ സമദ്,ഇ. പത്മാക്ഷന്‍, പി.എം ബഷീര്‍, ടി.കെ അശോക് കുമാര്‍, ബിനോയ് പാട്ടത്തില്‍, ബിജു കനകക്കുന്നേല്‍, ഇസ്മാഈല്‍ എരഞ്ഞിക്കല്‍, വിന്‍സന്റ് എം ഗോണ്‍സാഗ, എ. ഗോപിനാഥ്, പാനായി ജേക്കബ്, പാലോളി മെഹബൂബ്, അടുക്കത്ത് ഇസ്ഹാഖ്, വ്യാപാരിപ്രതിനിധികളായ യു നരേന്ദ്രന്‍, വിനോദ് പി മേനോന്‍ തുടങ്ങിയവര്‍ സംസാരിച്ചു.