തൃശൂര്‍: വലിപ്പം കുറഞ്ഞ ലൈഫ് ജാക്കറ്റ് അടക്കമുളള ആധുനിക ജീവന്‍ രക്ഷാ ഉപകരണങ്ങളെപ്പറ്റി മീന്‍പിടുത്ത തൊഴിലാളികളെ പരിചയപ്പെടുത്തുന്നതിനുതകും വിധം ജില്ലയിലെ പ്രധാന മത്സ്യബന്ധന തുറമുഖങ്ങളില്‍ പ്രദര്‍ശന ബോധവല്‍ക്കരണ പരിപാടികള്‍ സംഘടിപ്പിക്കാന്‍ ഫിഷറീസ് ഡെപ്യൂട്ടി ഡയറക്ടര്‍ക്ക് ജില്ലാ കളക്ടര്‍ ഡോ.ഏ.കൗശിഗന്‍ നിര്‍ദ്ദേശം നല്‍കി. തീരദേശ സുരക്ഷാ സമിതി, കടലോരം ജാഗ്രത സമിതി എന്നിവയുടെ സംയുക്ത യോഗത്തിലാണ് ജില്ലാ കളക്ടറുടെ നിര്‍ദ്ദേശം. നീന്തലറിയാത്ത മീന്‍പിടുത്ത തൊഴിലാളികളുടെ എണ്ണം ഏറിവരുന്ന  പശ്ചാത്തലത്തില്‍ മീന്‍ പിടുത്തതൊഴിലാളികള്‍ക്ക് നീന്തല്‍പരിശീലനം നല്‍കുന്നതിനെപ്പറ്റിയും യോഗം ചര്‍ച്ച ചെയ്തു. ഇത് സംബന്ധിച്ച കണക്കുകള്‍ ശേഖരിക്കാനും യോഗത്തില്‍ തീരുമാനമായി. തീരദേശത്തെ തദ്ദേശസ്വയംഭരണ സ്ഥാപനങ്ങളുടെ ഫണ്ട് വിനിയോഗ്യ സാധ്യതകള്‍ മത്സ്യതൊഴിലാളി മേഖലയില്‍ ഉപയോഗപ്പെടുത്തുന്നത് സംബന്ധിച്ച് ജില്ലാ പ്ലാനിംഗ് ഓഫീസറുമായി ചര്‍ച്ച ചെയ്യാനും യോഗത്തില്‍ നിര്‍ദ്ദേശമുയര്‍ന്നു. തീരദ്ദേശ റോഡുകളുടെ ശോച്യാവസ്ഥ പരിഹരിക്കാന്‍ നടപടികളുണ്ടാവണം. കൂടുതല്‍ ജീവന്‍ രക്ഷാഉപകരണങ്ങള്‍ ലഭ്യമാക്കണം.രക്ഷാബോട്ടിന് ഇന്ധനമില്ലാത്ത അവസ്ഥ അവസാനിപ്പിക്കണമെന്നും അലോട്ട്‌മെന്റുകള്‍ കൃത്യ സമയത്ത് ലഭ്യമാക്കാന്‍ നടപടിയെടുക്കണമെന്നും സമിതി അംഗങ്ങള്‍ ആവശ്യപ്പെട്ടു. തീരദ്ദേശ സുരക്ഷാ സംബന്ധിച്ച് പ്രശ്‌നങ്ങള്‍ ഇല്ല എന്നത് കൊണ്ട് ജാഗ്രത കുറവുണ്ടാകരുതെന്നും സുരക്ഷാപ്രവര്‍ത്തനങ്ങളില്‍ അതീവ ജാഗരൂകരാവണമെന്നും യോഗത്തില്‍ പങ്കെടുത്ത നാവികസേന കേരള മേധാവി ക്യാപ്റ്റന്‍ സുധീഷ് മാലിക് പറഞ്ഞു. അന്തര്‍ദ്ദേശീയ കപ്പല്‍ ചാലുകള്‍ കടന്ന് മീന്‍ പിടുത്തം നടത്തുന്നത് അപകടകരമാണെന്നും അപകടങ്ങളുണ്ടായാല്‍ ഇന്ത്യന്‍ ശിക്ഷ നിയമനുസരിച്ച് കേസെടുക്കാന്‍ പരിമിതികളുണ്ടെന്ന കാര്യം മീന്‍പിടുത്ത തൊഴിലാളികളെയും ബോട്ടുടമകളേയും ബോധ്യപ്പെടുത്തണമെന്നും അദ്ദേഹം അഭിപ്രായപ്പെട്ടു. കടലിലൂടെ ലഹരിവസ്തുക്കളും ആയുധങ്ങളും സ്‌ഫോടകവസ്തുക്കളും കടത്തുന്നത് സംബന്ധിച്ച് കടലോര ജാഗ്രത സമിതികളും തീരരക്ഷാ സമിതിയുടെ ജാഗരൂകരാക്കണമെന്നും യോഗത്തെ അറിയിച്ചു. തീരദ്ദേശ രക്ഷാസേന അസിസ്റ്റന്റ് കമ്മാണ്ടന്റ് സി.വി.ടോമി, ഫിഷറീസ് ഡെപ്യൂട്ടി ഡയറക്ടര്‍ എം.എസ്.സാജു, കൊടുങ്ങല്ലൂര്‍ പോര്‍ട്ട് കണ്‍സര്‍വേറ്റര്‍ ബിനു.ആര്‍, തൃശൂര്‍ സ്‌പെഷ്യല്‍ ബ്രാഞ്ച് ഡി.വൈ.എസ്.പി എസ്.ഷംസുദ്ദീന്‍, കസ്റ്റംസ് ഉദ്യോഗസ്ഥര്‍, തീരദ്ദേശ പോലീസ് ഉദ്യോഗസ്ഥര്‍, കടലോര ജാഗ്രത സമിതി പ്രവര്‍ത്തകര്‍ എന്നിവര്‍ സംബന്ധിച്ചു. യോഗത്തിന്റെ അജണ്ട മുന്‍കൂട്ടി മലയാളത്തില്‍ അംഗങ്ങളെ അറിയിക്കാനും തീരുമാനമായി.