തൃക്കരിപ്പൂര്‍: കവ്വായിക്കായലിന്റെ ഓളങ്ങളെ ഇളക്കിമറിച്ചും ആയിരക്കണക്കിനു കാണികളെ ആവേശത്തിരയിലേറ്റിയും ജലോത്സവം അരങ്ങേറി. മെട്ടമ്മല്‍ ബ്രദേഴ്‌സ് മെട്ടമ്മലിന്റെ നേതൃത്വത്തില്‍ സംഘടിപ്പിച്ച എ.പി.ജെ അബ്ദുല്‍ കലാം മെമ്മോറിയല്‍ ട്രോഫിക്കു വേണ്ടിയുള്ള മൂന്നാമതു മലബര്‍ ജലോത്സവം അക്ഷരാര്‍ഥത്തില്‍ കാണികളെ വിസ്മയിപ്പിച്ചു. മെട്ടമ്മല്‍ മുതല്‍ വെള്ളാപ്പ് കാവിലാട്ട് വരെയുള്ള കിലോമീറ്ററുകള്‍ ദൂരത്തില്‍ ഉച്ച വെയിലിനെ അവഗണിച്ചു കുട്ടികളും വലിയവരും അടങ്ങുന്ന കാണികള്‍ കായലിന്റെ അരികുപറ്റി വള്ളംകളി മത്സരത്തിനായി കാത്തിരിക്കുകയായിരുന്നു.
പുരുഷന്‍മാര്‍ക്ക് 25 പേര്‍, 15 പേര്‍ തുഴയും മത്സരങ്ങളും സ്ത്രീകള്‍ക്ക് 15 പേര്‍ തുഴയും മത്സരങ്ങളുമാണുണ്ടായിരുന്നത്. കൂടാതെ കായലോരത്തു കാണികളെ വിസ്മയിപ്പിച്ചു കണ്ണൂര്‍ വാട്ടര്‍ സ്‌പോര്‍ട്‌സിന്റെ സാഹസിക പ്രകടനങ്ങളും ഉണ്ടായിരുന്നു. രണ്ടോടെ തന്നെ 25 പേര്‍ തുഴയും വള്ളങ്ങളുടെ മത്സരം ആരംഭിച്ചിരുന്നു.
ജലോത്സവം ആരോഗ്യ സാമൂഹ്യക്ഷേമ മന്ത്രി കെ.കെ ശൈലജ ഉദ്ഘാടനം ചെയ്തു. സംഘാടക സമിതി ചെയര്‍മാന്‍ പി. കരുണാകരന്‍ എം.പി അധ്യക്ഷനായി. ഏഴിമല നാവിക അക്കാമി കമാന്‍ഡിങ് ഓഫിസര്‍ കമലേഷ് കുമാര്‍, കേണല്‍ രാജേഷ് കനോജിയ എന്നിവര്‍ മുഖ്യാതിഥികളായി. ജില്ലാ പൊലിസ് മേധാവി കെ.ജി സൈമണ്‍ ഫ്‌ളാഗ് ഓഫ് ചെയ്തു.
സംഘാടക സമിതി ജനറല്‍ കണ്‍വീനറും ജില്ലാ പഞ്ചായത്ത് പ്രസിഡന്റുമായ എ.ജി.സി ബഷീര്‍, മുന്‍ എം.എല്‍.എ കെ. കുഞ്ഞിരാമന്‍, ജില്ലാ ടൂറിസം പ്രമോഷന്‍ കൗണ്‍സില്‍ സെക്രട്ടറി ആര്‍. ബിജു, സിനിമാതാരം സുധീഷ് സുബി, ഗ്രാമപഞ്ചായത്ത് പ്രസിഡന്റ് വി.പി ഫൗസിയ, ജില്ലാ പഞ്ചായത്ത് അംഗങ്ങളായ വി.പി.പി മുസ്തഫ, പി.വി പത്മജ, പി.സി സുബൈദ, ബ്ലോക്ക് പഞ്ചായത്ത് അംഗം സാജിത സഫറുല്ല, വി.കെ ബാവ, കെ. റീത്ത, കെ.വി ലക്ഷ്മണന്‍, പി.കെ ഫൈസല്‍, ടി.വി ബാലകൃഷ്ണന്‍, ടി ഗംഗാധരന്‍, പി. കുഞ്ഞമ്പു, ഇ.വി ദാമോദരന്‍, കെ. ശശിധരന്‍, കെ.പി ദിനേശന്‍, എം.പി കരുണാകരന്‍, വി.വി സുബൈര്‍ സംസാരിച്ചു.