കാസര്‍കോട്: വിസ വാഗ്ദാനം ചെയ്തു പണം തട്ടിയ സംഭവത്തില്‍ വിദ്യാനഗര്‍ പൊലിസ് രണ്ടുപേര്‍ക്കെതിരേ കേസെടുത്തു.
ചെര്‍ക്കള പാടി എടനീര്‍ ചാപ്പാടി ഹൗസിലെ എന്‍.എ. അബ്ദുല്‍ ആസിഫിന്റെ (23) പരാതിയില്‍ കോഴിക്കോട് സ്വദേശികളായ അബ്ദുല്‍ ഹഖീം, ഇഖ്ബാല്‍ എന്നിവര്‍ക്കെതിരേയാണ് കേസ്. ആസിഫ്,ഇയാളുടെ സുഹൃത്തുക്കളായ റംഷീദ്, അര്‍ഷാദ്, ഗദ്ദാഫി എന്നിവരുടെ പണം കാനഡയിലേക്ക് വിസ വാഗ്ദാനം ചെയ്ത് തട്ടിയെടുത്തെന്നാണ് പരാതി.
കോഴിക്കോട് ആസ്ഥാനമായി പ്രവര്‍ത്തിക്കുന്ന വണ്ടര്‍ ജോബ്‌സ് എച്ച്.ആര്‍ സൊലൂഷ്യന്‍ എന്ന സ്ഥാപത്തിന്റെ പരസ്യം ഓണ്‍ലൈനില്‍ കണ്ടാണ് ഇവര്‍ വിസക്കായി അപേക്ഷ നല്‍കിയതെന്ന് പറയുന്നു.
കാനഡയില്‍ ജോലി ചെയ്യുന്നതിനുള്ള വിസക്ക് മൂന്നു ലക്ഷം രൂപയാണ് ആവശ്യപ്പെട്ടത്. ഇതില്‍ ഒന്നരലക്ഷം രൂപ ഇവിടെ വച്ചും ബാക്കി ഒന്നരലക്ഷം രൂപ കാനഡയില്‍ വച്ചും നല്‍കണമെന്നായിരുന്നു സംഘം ഇവരോട് ആവശ്യപ്പെട്ടത്.
ഇതിന് പുറമേ പ്രോസസിങ് ചാര്‍ജായി 40,000 രൂപയും ആവശ്യപ്പെട്ടു. ഇതേ തുടര്‍ന്ന് നാലുപേരും 40,000 രൂപ വീതം അടച്ചു. ബാക്കിയുള്ള തുക നല്‍കണമെന്നാവശ്യപ്പെട്ടപ്പോള്‍ ഗദ്ദാഫി ബാങ്ക് വഴി 40,000 രൂപ ഹഖീമിന്റെ അക്കൗണ്ടിലേക്ക് അയച്ചു കൊടുത്തതായി പറയുന്നു. ഇതിന് ശേഷമാണ് ഇവര്‍ക്ക് തട്ടിപ്പു മനസിലായത്. തുടര്‍ന്നാണ് പൊലിസില്‍ പരാതി നല്‍കിയത്.