വാഷിങ്ടണ്‍: എഴുത്തുകാരിയും കലാകാരിയും പ്രമുഖ ഫെമിനിസ്റ്റ് ആക്ടിവിസ്റ്റുമായിരുന്ന കെയ്റ്റ് മില്ലെറ്റ് അന്തരിച്ചു. 82 വയസായിരുന്നു. പാരിസില്‍ ജന്മദിനം ആഘോഷിക്കാനെത്തിയ കെയ്റ്റ് ഹൃദയാഘാതത്തെ തുടര്‍ന്നാണു മരണത്തിനു കീഴടങ്ങിയത്.
1934ല്‍ അമേരിക്കയിലെ മിനസ്സോട്ടയില്‍ ജനിച്ച കെയ്റ്റ് മിനസ്സോട്ട സര്‍വകലാശാലിയും ഓക്‌സ്‌ഫോഡ് സര്‍വകലാശാലയിലുമായാണ് പഠനം പൂര്‍ത്തിയാക്കിയത്. ഓക്‌സ്‌ഫോഡിനു കീഴിലെ സെന്റ് ഹില്‍ഡാസ് കോളജില്‍നിന്ന് ആദ്യമായി ഫസ്റ്റ് ക്ലാസോടെ ഡിഗ്രി നേടുന്ന അമേരിക്കന്‍ വനിതയുമായി കെയ്റ്റ്. ന്യൂയോര്‍ക്കിലെ കൊളംബിയ സര്‍വകലാശാലിയില്‍നിന്ന് പി.എച്ച്.ഡി നേടി. 1970കളില്‍ പുറത്തിറങ്ങിയ കെയ്റ്റിന്റെ 'സെക്ഷ്വല്‍ പൊളിറ്റിക്‌സ് ' എന്ന പുസ്തകം രണ്ടാം ഫെമിനിസ്റ്റ് മുന്നേറ്റത്തിന്റെ നാഴികക്കല്ലായാണ് അറിയപ്പെടുന്നത്. ഈ പുസ്തകം ഒറ്റ രാത്രി കൊണ്ട് 10,000 പ്രതികള്‍ വിറ്റുപോയും ചരിത്രത്തില്‍ ഇടംപിടിച്ചു.