വാഷിങ്ടണ്‍: എഫ്- 18, എഫ് 16 യുദ്ധവിമാനങ്ങള്‍ വാങ്ങാനുള്ള ഇന്ത്യയുടെ അപേക്ഷക്ക് യു.എസ് ഭരണകൂടത്തിന്റെ പിന്തുണ. ഇന്ത്യക്കു യുദ്ധവിമാനങ്ങള്‍ കൈമാറുന്ന കാര്യം ട്രംപ് ഭരണകൂടം ഇന്നലെ യു.എസ് കോണ്‍ഗ്രസിനെ അറിയിച്ചു. ഇന്ത്യയ്ക്കും യു.എസിനുമിടയിലെ പ്രതിരോധ സഹകരണത്തില്‍ നിര്‍ണായക വഴിത്തിരിവായി വിമാനക്കൈമാറ്റം മാറുമെന്ന് യു.എസ് വൃത്തങ്ങള്‍ അഭിപ്രായപ്പെട്ടു. ഇന്ത്യയുമായുള്ള പ്രതിരോധ സഹകരണങ്ങളില്‍ ഇന്തോ-പസഫിക് ഭാഗങ്ങളുടെ സുരക്ഷയ്ക്കു സുപ്രധാന പങ്കുവഹിക്കാനാകുമെന്ന് യു.എസ് തെക്കന്‍, മധ്യേഷ്യന്‍ സ്റ്റേറ്റ് അസി. സെക്രട്ടറി ആലിസ് വെല്‍സ് പറഞ്ഞു. കോണ്‍ഗ്രസിന്റെ സബ്കമ്മിറ്റിയില്‍ എഴുതി നല്‍കിയ സബ്മിഷനു മറുപടി പറയുകയായിരുന്നു അവര്‍. കഴിഞ്ഞ 70 വര്‍ഷത്തിനുള്ളില്‍ അന്താരാഷ്ട്ര സമൂഹത്തിന്റെ മാനവിക വിഷയങ്ങളില്‍ ഇന്ത്യ തന്ത്രപ്രധാനമായ പങ്കുവഹിച്ചുണ്ട്. ജനാധിപത്യം, തീവ്രവാദ വിരുദ്ധത തുടങ്ങിയ കാര്യങ്ങളില്‍ യു.എസും ഇന്ത്യയും സമാനനിലപാടുകളാണു സ്വീകരിക്കുന്നതെന്നും വെല്‍സ് പറഞ്ഞു.