തിരുവനന്തപുരം: ഓണാഘോഷ സമാപന രാവില്‍ നടന വിസ്മയമായി ചലച്ചിത്രതാരം ശോഭനയും സംഘവും. ഭരതനാട്യത്തിന്റെ ചാരുതയുള്ള ചുവടുകള്‍ അനന്തപുരിയിലെ ഓണാഘോഷ സമാപ്തി രാവിനെ ആനന്ദ സാഗരത്തിലാക്കി.
ഇടയ്ക്ക, ചെണ്ട എന്നിവ നൃത്തത്തിന് അകമ്പടിയായപ്പോള്‍ ഏഴ് മണിക്ക് മുന്‍പ് തന്നെ നിശാഗന്ധിയും പരിസരവും ജനിബിഢമായിരുന്നു.
സെന്‍ട്രല്‍ സ്റ്റേഡിയത്തില്‍ വിനീത് ശ്രീനിവാസന്റെ നേതൃത്വത്തില്‍ മെഗാഷോ നടന്നപ്പോള്‍ പൂജപ്പുര മൈതാനിയില്‍ ജാസി ഗിഫറ്റും സംഘവും അവതരിപ്പിച്ച ഗാനമേള ജനങ്ങളെ ഉത്സവ ലഹരിയിലാഴ്ത്തി. കൂടാതെ, സൂര്യകാന്തി, പബ്ലിക് ഓഫിസ് കോമ്പൗണ്ട് എന്നിവിടങ്ങളിലും ഗാനമേള അരങ്ങേറി. ഗാന്ധിപാര്‍ക്ക്, പേരൂര്‍ക്കട ബാപ്പുജി ലൈബ്രറി, നെയ്യാറ്റിന്‍കര മുനിസിപ്പല്‍ ഗ്രൗണ്ട്, ശ്രീചിത്തിര തിരുനാള്‍ പാര്‍ക്ക് എന്നിവിടങ്ങളിലും കഥാപ്രസംഗം നടന്നു.