കൊച്ചി: രാജ്യത്ത് മോദി ഭരണത്തിന്റെ പടിയിറക്കത്തിന് തുടക്കമായെന്ന് സി.പി.എം ജനറല്‍ സെക്രട്ടറി സീതാറാം യെച്ചൂരി. രാജ്യത്തെ യുവജനങ്ങളിലും വിദ്യാര്‍ഥികളിലും മോദി ഭരണത്തിന് എതിരായ വികാരം ശക്തിപ്പെടുകയാണ്. ജെ.എന്‍.യുവും ഹൈദരാബാദ് കേന്ദ്രസര്‍വകലാശാലയും അടക്കമുള്ള കാംപസുകളില്‍ ഇടതുപക്ഷ വിദ്യാര്‍ഥി യൂനിയനുകള്‍ വിജയിച്ചത് ഇതിന് തെളിവാണ്. ദക്ഷിണേഷ്യന്‍ കമ്മ്യൂണിസ്റ്റ്-ഇടതു പാര്‍ട്ടികളുടെ സമ്മേളനത്തിന് സമാപനംകുറിച്ച് മറൈന്‍ഡ്രൈവില്‍ നടന്ന പൊതുസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
സര്‍ജിക്കല്‍ സ്‌ട്രൈക്കിനു ശേഷം കൊല്ലപ്പെടുന്ന ഇന്ത്യക്കാരുടെ എണ്ണം ഇരട്ടിയായി. കശ്മിര്‍ താഴ്‌വര മൂന്നു വര്‍ഷമായി എരിയുകയാണ്. കശ്മിരിനെ തിളപ്പിച്ചുനിര്‍ത്തേണ്ടത് മോദി സര്‍ക്കാരിന്റെ ആവശ്യമാണെന്നും യെച്ചൂരി പറഞ്ഞു. ഇന്ത്യയിലെ ഫാസിസത്തെ ചെറുക്കാന്‍ ചെങ്കൊടി പ്രസ്ഥാനങ്ങള്‍ക്കു മാത്രമേ കഴിയൂവെന്ന് അധ്യക്ഷത വഹിച്ച സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു.