കല്‍പ്പറ്റ: അഞ്ചു വര്‍ഷമായി തരിശിട്ടിരുന്ന അഞ്ചര ഏക്കര്‍ സ്ഥലത്ത് വയനാടന്‍ വിത്തെറിഞ്ഞ് കുടുംബശ്രീ ജില്ലാമിഷന്‍ നടപ്പിലാക്കുന്ന സീഡ് ബാങ്ക് പദ്ധതിക്ക് തുടക്കമായി. സീഡ് ബാങ്കിന്റെ ഉദ്ഘാടനം ഐ.സി ബാലകൃഷ്ണന്‍ എം.എല്‍.എ നിര്‍വഹിച്ചു. വയനാടന്‍ പാരമ്പര്യ വിത്തിനങ്ങളെ സംരക്ഷിക്കുക എന്ന ലക്ഷ്യത്തോടെയാണ് പദ്ധതി ആരംഭിച്ചത്.
ചെന്നല്ല്, വയനാടന്‍ ജീരകശാല, വയനാടന്‍ ഗന്ധകശാല, വെളിയന്‍, പാല്‍തൊണ്ടി, അടുക്കന്‍, രക്തശാലി എന്നീ ഏഴിനങ്ങളാണ് വിതച്ചത്. ജൈവ രീതിയില്‍ തയ്യറാക്കിയ പെല്ലറ്റുകളാണ് വിതക്കാനായി തയാറാക്കിയത്. കെട്ടി നാട്ടി എന്നറിയപ്പെടുന്ന ഈ കൃഷിരീതിയില്‍ കുടുംബശ്രീ ജെ.എല്‍.ജികള്‍ക്ക് ഇതിനോടകം തന്നെ പരിശീലനം നല്‍കിയിട്ടുണ്ട്. കുടുംബശ്രീയംഗങ്ങളും നാട്ടുകാരുമടക്കം നൂറുകണക്കിനാളുകള്‍ പരിപാടിയില്‍ പങ്കെടുത്തു. ചടങ്ങില്‍ പൂതാടി ഗ്രാമപഞ്ചായത്ത് പ്രസിഡന്റ് രുഗ്മിണി സുബ്രഹ്മണ്യന്‍ അധ്യക്ഷയായി.
ജില്ലാ മിഷന്‍ കോര്‍ഡിനേറ്റര്‍ പി സാജിത പദ്ധതി വിശദീകരിച്ചു. പി.വി ശിവന്‍, ശ്രീജ സാബു, സിബി സാബു, മേഴ്‌സി സാബു, അജി തോമസ് കുന്നേല്‍, പൗലോസ്, കെ.പി ജയചന്ദ്രന്‍, കെ.എ ഹാരിസ്, കെ.ടി മുരളി, പി.കെ സുഹൈല്‍ എന്നിവര്‍ സംസാരിച്ചു.