ശ്രീനഗര്‍: പതിവു പോലെ പ്രധാനമന്ത്രി നരേന്ദ്രമോദിയുടെ ദീപാവലി ആഘോഷം സൈനികര്‍ക്കൊപ്പം തന്നെ. ഇത്തവണ ജമ്മു കശ്മീരിലെ ഗുരെസിലാണ് മോദി സൈനികര്‍ക്കൊപ്പം ദീപാവലി ആഘോഷിക്കാനെത്തിയത്. ശ്രീനഗറില്‍ നിന്നും 123 കിലോമീറ്റര്‍ അകലെയുള്ള പ്രകൃതി സുന്ദരമായ പ്രദേശമാണ് ഗുരെസ്.

പ്രധാനമന്ത്രിയായതിന് പിന്നാലെ 2014 ലാണ് മോദി ദീപാവലി ആഘോഷിക്കാന്‍ ആദ്യമായി ജമ്മു കശ്മീരിലെത്തുന്നത്. സിയാച്ചിനിലെ സൈനിക പോസ്റ്റുകളിലായിരുന്നു അന്നത്തെ ദീപാവലി ആഘോഷം. ഒരുദിവസം അവിടെ തങ്ങിയ മോദി 570 കോടിയുടെ പ്രത്യേക പാക്കേജ് ജമ്മു കശ്മീരിനുവേണ്ടി പ്രഖ്യാപിച്ചാണ് മടങ്ങിയത്.

2015 ല്‍ പഞ്ചാബിലെ ഇന്ത്യാ പാക് അതിര്‍ത്തിയിലായിരുന്നു ആഘോഷം. 2016 ല്‍ ഹിമാചല്‍ അതിര്‍ത്തിയിലെത്തി.  അവിടെ ചങ്കോ എന്ന അതിര്‍ത്തി ഗ്രാമത്തില്‍ മിന്നല്‍ സന്ദര്‍ശനം നടത്തിയ മോദി ഗ്രാമീണര്‍ക്കൊപ്പവും ദീപാവലി സന്തോഷം പങ്കിട്ടു.