തിരുവനന്തപുരം: കേരളത്തിന്റെ പ്രവര്‍ത്തനങ്ങളെ പ്രശംസകള്‍ കൊണ്ട് മൂടി വീണ്ടും രാഷ്ട്രപതി. ആരോഗ്യം, വിദ്യാഭ്യാസം, വിനോദസഞ്ചാരം, ഐ.ടി എന്നീ മേഖലകളില്‍ കേരളം രാജ്യത്തെ മറ്റു സംസ്ഥാനങ്ങള്‍ക്ക് മാതൃകയാണെന്ന് രാഷ്ട്രപതി രാംനാഥ് കോവിന്ദ് പറഞ്ഞു.
രാജ്യത്തിന്റെ സാമ്പത്തിക രംഗത്തെ പുരോഗതി ഡിജിറ്റല്‍ ഇന്ത്യയെ അടിസ്ഥാനപ്പെടുത്തിയാകുമെന്ന് പറഞ്ഞ രാഷ്ട്രപതി ഡിജിറ്റല്‍ ഇന്ത്യയുടെ വളര്‍ച്ചയ്ക്ക് ഇന്ത്യയുടെ പവര്‍ഹൗസ് കേരളമാണെന്നും പറഞ്ഞു. ടെക്‌നോപാര്‍ക്ക് വികസനത്തിന്റെ നാലാംഘട്ടമായ ടെക്‌നോസിറ്റിയുടെ ശിലാസ്ഥാപനം തിരുവനന്തപുരത്ത് നിര്‍വഹിച്ചു സംസാരിക്കുകയായിരുന്നു അദ്ദേഹം. കേരളം സാമ്പത്തികമായും സാമുഹ്യമായും ഒന്നാം സ്ഥാനത്താണ്. ഐ.ടി മേഖലയില്‍ കേരളം കുതിപ്പ് തുടരുകയാണ്. ഉയര്‍ന്ന തോതിലുള്ള മൊബൈല്‍ ഫോണ്‍ കണക്ഷനുകളും വ്യാപകമായ ഇന്റര്‍നെറ്റ് സൗകര്യങ്ങളും വിവരസാങ്കേതിക രംഗത്തെ വിടവ് കേരളത്തില്‍ വലിയ തോതില്‍ കുറച്ചിട്ടുണ്ട്. സംസ്ഥാന സര്‍ക്കാര്‍ ഇക്കാര്യത്തില്‍ സ്വീകരിക്കുന്ന നടപടികള്‍ അഭിനന്ദനീയമാണ്.
കേരളത്തിന്റെ നേട്ടങ്ങള്‍ പൊള്ളയാണെന്ന ബി.ജെ.പി പ്രചാരണത്തിനിടെയാണ് രാംനാഥ് കോവിന്ദിന്റെ പ്രശംസയെന്നത് ശ്രദ്ധേയമാണ്.
മതസൗഹാര്‍ദത്തിന്റെ കാര്യത്തില്‍ മറ്റു സംസ്ഥാനങ്ങള്‍ കേരളത്തെ കണ്ടുപഠിക്കണമെന്നും കേരളം ആത്മീയ ഇടമാണെന്നും ഇവിടത്തെ ആരോഗ്യ, സേവന, വൈജ്ഞാനിക മേഖലകള്‍ പേരുകേട്ടതാണെന്നും അദ്ദേഹം വ്യക്തമാക്കി. ടൂറിസം മേഖലയിലും മികച്ച സംഭാവനയാണ് കേരളം നല്‍കിയിരിക്കുന്നത്. ഇത് ദൈവത്തിന്റെ സ്വന്തം നാടു തന്നെയാണെന്നും സേവനമേഖലകളില്‍ സ്വന്തമാക്കിയ നേട്ടങ്ങള്‍ക്കൊപ്പം സമൃദ്ധമായ വിവരസമ്പത്ത് കൊണ്ടും കേരളം ഇനി അറിയപ്പെടാന്‍ പോവുകയാണെന്നും രാഷ്ട്രപതി പറഞ്ഞു. ഗവര്‍ണര്‍ പി. സദാശിവം, മുഖ്യമന്ത്രി പിണറായി വിജയന്‍, മന്ത്രി കടകംപള്ളി സുരേന്ദ്രന്‍, എ. സമ്പത്ത് എം.പി, സി. ദിവാകരന്‍ എം.എല്‍.എ, ചീഫ് സെക്രട്ടറി കെ.എം എബ്രഹാം, ഐ.ടി സെക്രട്ടറി എം. ശിവശങ്കര്‍, ടെക്‌നോപാര്‍ക് സി.ഇ.ഒ ഋഷികേശ് നായര്‍ സംബന്ധിച്ചു.