എടവണ്ണ: കുണ്ടുതോടില്‍ ജനവാസ കേന്ദ്രത്തില്‍ പുതുതായി ആരംഭിക്കുന്ന ക്രഷര്‍ യൂനിറ്റും പരിസരങ്ങളും മലിനീകരണ നിയന്ത്രണ ബോര്‍ഡ് അധികൃതര്‍ സന്ദര്‍ശിച്ചു. പുതുതായി ആരംഭിക്കുന്ന ക്രഷര്‍ യൂനിറ്റിനെതിരേ വന്‍തോതില്‍ ആരോഗ്യ പ്രശ്‌നങ്ങള്‍ക്കിടയാക്കുമെന്ന് ആരോപിച്ച് സമീപത്തെ ഹരിജന്‍ കോളനി നിവാസികളടക്കമുള്ള നാട്ടുകാര്‍ സമര രംഗത്തുവന്നിരുന്നു.
തുടര്‍ന്ന് നാട്ടുകാരുടെ ശക്തമായ ഇടപെടല്‍ മൂലം എടവണ്ണ പഞ്ചായത്ത് ബോര്‍ഡ് മീറ്റിങ്ങില്‍ ക്രഷര്‍ യൂനിറ്റിന് നല്‍കിയ കെട്ടിടാനുമതി റദ്ദാക്കുകയും തുടര്‍ന്ന് കലക്ടര്‍ യൂനിറ്റിന്റെ പ്രവര്‍ത്തനം സ്റ്റേ ചെയ്യുകയും ചെയ്തിരുന്നു. തുടര്‍ന്ന് പ്രദേശവാസികള്‍ തിരുവനന്തപുരത്തെ മലിനീകരണ നിയന്ത്രണ ബോര്‍ഡ് മെമ്പര്‍ക്ക് നല്‍കിയ പരാതിയുടെ അടിസ്ഥാനത്തിലാണ് കോഴിക്കോട് റീജിയനല്‍ ഓഫിസിലെ അസി.എക്‌സിക്യൂട്ടിവ് എന്‍ജിനിയര്‍ സൗമ്യ, ജില്ലാ ഓഫിസിലെ റീമന എന്നിവരുടെ നേതൃത്വത്തിലുള്ള സംഘമാണ് ഇന്നലെ കുണ്ടുതോടിലെ ക്രഷര്‍ യൂനിറ്റിലും പരിസരത്തെ കോളനിയിലും പരിശോധന നടത്തിയത്.
പഞ്ചായത്തംഗം തേലക്കാട്ട് സാക്കിര്‍, സി.പി.എം എടവണ്ണ ലോക്കല്‍ സെക്രട്ടറി എം. ജാഫര്‍, ബ്രാഞ്ച് സെക്രട്ടറി രഞ്ജിത്ത്, പി.കെ മുഹമ്മദലി തുടങ്ങിയ അന്‍പതോളം പേര്‍ സംഘത്തെ അനുഗമിച്ചു.