പെഷാവര്‍: പാകിസ്താനിലെ പെഷാവറില്‍ കാര്‍ഷിക ഡയരക്ടറേറ്റിന്റെ ഹോസ്റ്റല്‍ കെട്ടിടത്തില്‍ തീവ്രവാദി ആക്രമണം. സംഭവത്തില്‍ 16 പേര്‍ക്ക് പരുക്ക്. ആക്രമണത്തിന്റെ ഉത്തരവാദിത്തം തഹ്‌രീകെ താലിബാന്‍ ഏറ്റെടുത്തു.

സുരക്ഷാ സൈനികര്‍ നടത്തിയ തിരിച്ചടിയില്‍ നാലു തീവ്രവാദികളെ വധിച്ചതായി പാക് പത്രം ഡോണ്‍ റിപ്പോര്‍ട്ട് ചെയ്തു. സ്ഥലത്ത് തിരച്ചില്‍ തുടരുകയാണ്.

വെള്ളിയാഴ്ച രാവിലെ വെടിവയ്‌പ്പോടെയാണ് ആക്രമണം തുടങ്ങിയത്. ബുര്‍ഖ ധരിച്ചെത്തിയ മൂന്നു പേര്‍ കെട്ടിടത്തിനകത്ത് പ്രവേശിക്കുകയും വെടിയുതിര്‍ക്കുകയുമായിരുന്നു.

നബിദിനം പ്രമാണിച്ച് ഡയരക്ടറേറ്റ് ഹോസ്റ്റലിന് ഇന്ന് അവധിയാണ്. അതിനാല്‍ താമസക്കാരും കുറവായിരുന്നു. കെട്ടിടത്തിനകത്തു നിന്ന് 10 പേരെ സൈന്യം രക്ഷപ്പെടുത്തി.

ഓട്ടോ റിക്ഷയിലാണ് തീവ്രവാദികള്‍ സ്ഥലത്തെത്തിയത്. സെക്യൂരിറ്റി ഗാര്‍ഡിനെ വെടിവച്ച ശേഷമാണ് അകത്തു കടന്നത്. തുടര്‍ന്ന് അകത്തുള്ളവര്‍ക്കു നേരെയും വെടിയുതിര്‍ക്കുകയായിരുന്നു.