കൊരാപുട്ട്: മതിയായ രേഖകളില്ലെന്ന് പറഞ്ഞ് ആശുപത്രിയില്‍ പ്രവേശനം നിഷേധിക്കപ്പെട്ട ആദിവാസി യുവതി തെരുവിലെ അഴുക്കുചാലില്‍ പ്രസവിച്ചു. ഒഡിഷയിലെ ജാനിഗുഡ ഗ്രാമവാസിയായ 30 കാരി ദെയ്‌ന മുദുലിയെന്ന ആദിവാസി യുവതിക്കാണ് ഒഡിഷയിലെ കൊരാപുട്ടിലെ സഹീദ് ലക്ഷ്മണ്‍ നായക് മെഡിക്കല്‍ കോളജ് ആശുപത്രിയില്‍ മതിയായ രേഖകളില്ലെന്ന് പറഞ്ഞ് പ്രവേശനം നിഷേധിച്ചത്. രാജ്യത്തെ നടുക്കിയ ഈ സംഭവത്തെക്കുറിച്ച് അന്വേഷിക്കാന്‍ ആരോഗ്യവകുപ്പ് ഉത്തരവിട്ടിട്ടുണ്ട്.
പനിയെതുടര്‍ന്ന് മെഡിക്കല്‍ കോളജ് ആശുപത്രിയില്‍ പ്രവേശിപ്പിക്കപ്പെട്ട ഭര്‍ത്താവ് രഘു മുദുലിയെ കാണാനായി യുവതിയും ഇവരുടെ മാതാവും സഹോദരിയും ആശുപത്രിയില്‍ എത്തിയിരുന്നു. ഈ സമയത്താണ് പ്രസവവേദന അനുഭവപ്പെട്ടത്. ലേബര്‍ റൂമില്‍ പ്രവേശിപ്പിക്കണമെന്ന് ആവശ്യപ്പെട്ടെങ്കിലും മതിയായ രേഖകള്‍ ഹാജരാക്കാത്തതിന്റെ പേരില്‍ ആശുപത്രി അധികൃതര്‍ ഇത് നിരസിച്ചു. ഇതോടെ ഇവര്‍ ഇവിടെനിന്ന് പുറത്തുപോയെങ്കിലും അവസാനം അഴുക്കുചാലില്‍ പ്രസവിക്കുകയായിരുന്നു.
സംഭവം വിവാദമായതോടെ യുവതിയെയും കുഞ്ഞിനെയും ഉടന്‍ തന്നെ ആശുപത്രിയിലേക്ക് മാറ്റി. കുഞ്ഞിനെ നവജാത ശിശുക്കളുടെ തീവ്രപരിചരണ വാര്‍ഡിലേക്ക് മാറ്റിയിരിക്കുകയാണ്. മാതാവും കുഞ്ഞും സുഖമായിരിക്കുന്നതായി ആശുപത്രി സൂപ്രണ്ട് സീതാറാം മൊഹാപത്ര അറിയിച്ചു.