പെര്‍ത്ത്: മൂന്നാം ടെസ്റ്റില്‍ ഇംഗ്ലണ്ടിനെ ഇന്നിങ്‌സിനും 41 റണ്‍സിനും കീഴടക്കി ആഷസ് ക്രിക്കറ്റ് കിരീടം ആസ്‌ത്രേലിയ തിരിച്ചുപിടിച്ചു. അഞ്ച് ടെസ്റ്റുകളടങ്ങിയ പരമ്പര 3-0ത്തിനാണ് ഓസീസ് പിടിച്ചെടുത്തത്. ശേഷിക്കുന്ന രണ്ട് മത്സരങ്ങള്‍ കൂടി വിജയിച്ച് പരമ്പര തൂത്തുവാരുകയാണ് ഇനി ആതിഥേയരുടെ ലക്ഷ്യം.
ഇംഗ്ലണ്ടിന്റെ ഒന്നാം ഇന്നിങ്‌സ് 403ല്‍ അവസാനിപ്പിച്ച ഓസീസ് ഒന്നാം ഇന്നിങ്‌സില്‍ ഒന്‍പത് വിക്കറ്റ് നഷ്ടത്തില്‍ 662 റണ്‍സെടുത്ത് ഡിക്ലയര്‍ ചെയ്തിരുന്നു. 259 റണ്‍സ് ലീഡ് വഴങ്ങി രണ്ടാം ഇന്നിങ്‌സ് തുടങ്ങിയ ഇംഗ്ലണ്ടിന്റെ പോരാട്ടം 218 റണ്‍സില്‍ അവസാനിപ്പിച്ചാണ് ആസ്‌ത്രേലിയ വിജയത്തോടെ പരമ്പര ഭദ്രമാക്കിയത്.
മഴയും പിച്ചിലെ ഈര്‍പ്പവും കാരണം അഞ്ചാം ദിനം മത്സരം തുടങ്ങാന്‍ വൈകിയിരുന്നു. എന്നാല്‍ നാല് വിക്കറ്റ് നഷ്ടത്തില്‍ 132 റണ്‍സെന്ന നിലയില്‍ അഞ്ചാം ദിനം ബാറ്റിങിനിറങ്ങിയ ഇംഗ്ലണ്ടിന് പിടിച്ചുനില്‍ക്കാനുള്ള ആര്‍ജവം പോലും ഇല്ലാതെ പോയത് ഓസീസിന് കാര്യങ്ങള്‍ എളുപ്പമാക്കി. ശേഷിച്ച ആറ് ഇംഗ്ലീഷ് വിക്കറ്റുകള്‍ വെറും 86 റണ്‍സില്‍ നിലംപൊത്തി. അഞ്ച് വിക്കറ്റുകള്‍ വീഴ്ത്തിയ ജോഷ് ഹാസ്‌ലെവുഡിന്റെ മാരക ബൗളിങിന് മുന്നില്‍ ഇംഗ്ലീഷ് നിര തകര്‍ന്നടിയുകയായിരുന്നു. ആദ്യ ഇന്നിങ്‌സില്‍ ഹാസ്‌ലെവുഡ് മൂന്ന് വിക്കറ്റുകള്‍ പിഴുത് മത്സരത്തില്‍ മൊത്തം എട്ട് വിക്കറ്റുകളാണ് സ്വന്തമാക്കിയത്. പാറ്റ് കമ്മിന്‍സ്, നതാന്‍ ലിയോണ്‍ എന്നിവര്‍ രണ്ട് വീതം വിക്കറ്റുകളും മിച്ചല്‍ സ്റ്റാര്‍ക്ക് ഒരു വിക്കറ്റും വീഴ്ത്തി. ഇംഗ്ലണ്ടിന്റെ രണ്ടാം ഇന്നിങ്‌സില്‍ ജെയിംസ് വിന്‍സ് (55), ഡേവിഡ് മാലന്‍ (54) എന്നിവര്‍ അര്‍ധ ശതകം പിന്നിട്ടതൊഴിച്ചാല്‍ മറ്റ് ബാറ്റ്‌സ്മാന്‍മാരെല്ലാം ചടങ്ങ് തീര്‍ത്ത് മടങ്ങി.
ക്യാപ്റ്റന്‍ സ്റ്റീവന്‍ സ്മിത്ത് നേടിയ രണ്ടാം ടെസ്റ്റ് ഇരട്ട സെഞ്ച്വറിയും (239), മിച്ചല്‍ മാര്‍ഷ് നേടിയ കന്നി ടെസ്റ്റ് സെഞ്ച്വറിയും (181) ഓസീസിനെ ഒന്നാം ഇന്നിങ്‌സില്‍ കൂറ്റന്‍ സ്‌കോറിലേക്ക് നയിക്കുകയായിരുന്നു. സ്മിത്താണ് കളിയിലെ കേമന്‍.