മലപ്പുറം: ഇന്ത്യയിൽ നിന്ന് ഈ വർഷം ഹജ്ജിന് അവസരം ലഭിച്ചവരിൽ 17,207 തീർഥാടകർ യാത്ര റദ്ദാക്കി. ഇതിൽ  1324 പേർ കേരളത്തിൽ നിന്നുള്ളവരാണ്.  യാത്ര റദ്ദാക്കിയവരുടെ സീറ്റിലേക്ക് വെയിറ്റിങ് ലിസ്റ്റിലുള്ളവർക്ക് അവസരം നൽകുന്നുണ്ട്. യാത്രാ നിരക്ക് ഉയർന്നതാണ് തീർഥാടനം മാറ്റിവയ്ക്കാൻ ചിലരെ പ്രേരിപ്പിച്ചത്. മരണം, അസുഖം, അപകടം തുടങ്ങിയവയും യാത്ര റദ്ദാക്കലിന് പിന്നിലുണ്ട്. മെഹ്‌റം മരിച്ചതിനാൽ യാത്ര റദ്ദാക്കിയവരുമുണ്ട്.

ഓരോ സംസ്ഥാനത്തും യാത്ര റദ്ദാക്കിയവരുടെ സീറ്റിലേക്ക് അതത് ഇടങ്ങളിലെ വെയിറ്റിങ് ലിസ്റ്റിലുള്ളവർക്കാണ്  അവസരം നൽകുന്നത്. വെയിറ്റിങ് ലിസ്റ്റില്ലാത്ത സംസ്ഥാനങ്ങളിലെ സീറ്റുകൾ മറ്റു സംസ്ഥാനങ്ങൾക്കും നൽകും. കേരളത്തിൽ ഇതുവരെ 2208 പേർക്കാണ് വെയിറ്റിങ് ലിസ്റ്റിൽ അവസരം ലഭിച്ചത്.

വെയിറ്റിങ് ലിസ്റ്റിൽ കൂടുതൽ പേർക്ക് അവസരം ലഭിച്ചത് മഹാരാഷ്ട്രയിലാണ്. ഇതുവരെയായി അവിടെ 4789 പേർക്ക് അവസരം കിട്ടി.  കർണാടക 2310, തെലങ്കാന 2288, ഗുജറാത്ത് 2207, തമഴ്‌നാട് 1319, മധ്യപ്രദേശ് 1136, ഡൽഹി 790, ഛത്തീസ്ഗഡ് 160 പേർക്കും അവസരം ലഭിച്ചു.