തൃപ്പൂണിത്തുറയിൽ പടക്കപ്പുരയിൽ വൻ സ്ഫോടനം; ഏഴ് പേർക്ക് പരിക്ക്, 25 വീടുകൾക്ക് നാശനഷ്ടം, വാഹനങ്ങൾ തകർന്നു

കൊച്ചി: തൃപ്പൂണിത്തുറയില്‍ സൂക്ഷിച്ചിരുന്ന പടക്കം പൊട്ടിത്തെറിച്ച് വൻ സ്ഫോടനം. അപകടത്തിൽ ഏഴ് പേർക്ക് പരിക്കേറ്റതായാണ് പ്രാഥമിക വിവരം. രണ്ടു പേര്‍ക്കു ഗുരുതരമായി പരിക്കേറ്റിട്ടുണ്ട്. പുതിയകാവ് ചൂരക്കാട് ഭാഗത്ത് സ്‌ഫോടകവസ്തുക്കള്‍ ശേഖരിച്ച് വച്ചിരുന്ന സ്ഥലത്താണ് സ്‌ഫോടനം ഉണ്ടായത്. സമീപത്തെ വീടുകള്‍ക്കും കേടുപാടുണ്ടായി. സ്ഫോടനാവശിഷ്ടങ്ങൾ 400 മീറ്റർ ദൂരെ വരെയുള്ള സ്ഥലത്തേക്ക് തെറിച്ച് വീണു. കിലോമീറ്റർ ദൂരേക്ക് വരെ സ്ഫോടന ശബ്ദം കേട്ടതായാണ് വിവരം.

രാവിലെ 10.30 ഓടെയാണ് പടക്കശാലയിൽ സ്ഫോടനം ഉണ്ടായത്. തൊട്ടടുത്തുള്ള പുതിയകാവ് അമ്പലത്തിൽ ഉത്സവത്തിന് പൊട്ടിക്കാനായി സൂക്ഷിച്ചിരുന്ന പടക്കമാണ് പൊട്ടിത്തെറിച്ചത്. വൻശബ്ദത്തോടെയാണ് സ്‌ഫോടനമുണ്ടായത്. സമീപത്തുള്ള നിരവധി വീടുകൾക്ക് കേടുപാടുകൾ പറ്റിയിട്ടുണ്ട്. സമീപത്ത് നിർത്തിയിട്ടിരുന്ന വാഹനം പൂർണമായും നശിച്ചു.

പൊലിസും ഫയർ ഫോഴ്സ് ഉദ്യോഗസ്ഥരും സ്ഥലത്തെത്തിയിട്ടുണ്ട്. നാട്ടുകാരുമായി ചേർന്ന് രക്ഷാപ്രവർത്തനം തുടരുകയാണ്.