മികച്ച ആശയങ്ങളുണ്ടോ? റിസർവ് ബാങ്ക് ഒരു ലക്ഷം രൂപ സമ്മാനം നൽകും

ന്യൂഡൽഹി: സാമ്പത്തിക സാക്ഷരത വിദ്യാർഥികളിൽ വർധിപ്പിക്കുന്നതിനായി ആശയങ്ങൾ ക്ഷണിച്ച് റിസർവ് ബാങ്ക് ഓഫ് ഇന്ത്യ. മികച്ച ആശയങ്ങൾക്ക് ഒരു ലക്ഷം രൂപ വരെ സമ്മാനം നൽകിയാണ് ആശയങ്ങൾ ക്ഷണിച്ചത്. പി.ജി വിദ്യാർഥികൾക്കാണ് അവസരം. 'Money Matters for young adults; Rethinking outreach strategies' എന്ന വിഷയത്തിൽ 2,000 വാക്കിൽ കവിയാതെയുള്ള ഐഡിയേഷൻ പേപ്പറാണ് സമർപ്പിക്കേണ്ടത്.

മികച്ച ആശയങ്ങൾക്ക് 1,00,000 രൂപ, 75,000 രൂപ, 25,000 രൂപ എന്നിങ്ങനെയാണ് സമ്മാനം. മികച്ച ആശയങ്ങൾ റിസർവ് ബാങ്ക് നടപ്പാക്കും. സാമ്പത്തിക സാക്ഷരത, അടിസ്ഥാന സാമ്പത്തിക അറിവുള്ള ആളുകളെ ശാക്തീകരിക്കുകയാണ് ആർബിഐ ലക്ഷ്യമിടുന്നത്. എല്ലാ ബിരുദാനന്തര ബിരുദ വിദ്യാർഥികൾക്കും മത്സരം ലഭ്യമാണ്.

പങ്കെടുക്കുന്നവർ അവരുടെ ഐഡിയേഷൻ പേപ്പറുകൾ ഹിന്ദിയിലോ ഇംഗ്ലീഷിലോ പിഡിഎഫ് ഫോർമാറ്റിലാക്കിയാണ് സമർപ്പിക്കേണ്ടത്. ഒരാളുടെ ഒന്നിലധികം എൻട്രികൾ സ്വീകരിക്കില്ല. സമർപ്പിക്കലുകൾ യഥാർത്ഥവും പ്രസിദ്ധീകരിക്കാത്തതുമായ സൃഷ്ടികളായിരിക്കണം. കോപ്പിയടി അയോഗ്യതയായി കണക്കാക്കും. വിജയികളെ ഈ വിവരം ഇമെയിൽ വഴി അറിയിക്കും.

അവസാന തീയതി: മാർച്ച് 20. വൈകീട്ട് 6 മണി

കൂടുതൽ വിവരങ്ങൾക്ക്: https://rbidocs.rbi.org.in/rdocs/content/pdfs/FLIWEEK26022024.pdf