ഭുവനേശ്വര്‍: കൊവിഡ് പ്രതിരോധത്തിന് ചോണനുറുമ്പ് ചട്‌നി ഉപയോഗിക്കണോ എന്ന കാര്യത്തില്‍ തീരുമാനമെടുക്കാന്‍ കോടതി നിര്‍ദേശം. 

ഇക്കാര്യത്തില്‍ മൂന്നു മാസത്തിനുള്ളില്‍ തീരുമാനം അറിയിക്കണമെന്ന് കേന്ദ്ര ആയുഷ് മന്ത്രാലയം ഡയറക്ടര്‍ ജനറലിനും കൗണ്‍സില്‍ ഓഫ് സയന്റിഫിക് ആന്‍ഡ് ഇന്‍ഡസ്ട്രിയല്‍ റിസര്‍ചിനും (സി.എസ്.ഐ.ആര്‍) ഒഡിഷ ഹൈക്കോടതിയാണ് നിര്‍ദേശം നല്‍കിയതെന്ന് 'ടൈംസ് ഓഫ് ഇന്ത്യ' റിപ്പോര്‍ട്ട് ചെയ്തു.

കൊവിഡ് ചികിത്സയില്‍ ചോണനുറുമ്പ് മികച്ച അനുകൂലഫലം നല്‍കുമെന്ന് എന്‍ജിനീയറും ഗവേഷകനുമായ നയാധാര്‍ പാദിയാല്‍ കഴിഞ്ഞവര്‍ഷം അവകാശപ്പെട്ടിരുന്നു. ഇതിനു പിന്നാലെ ഇക്കാര്യം ഉന്നയിച്ച് അദ്ദേഹം കോടതിയില്‍ പൊതുതാല്‍പര്യ ഹരജി സമര്‍പിച്ചു. ഹരജി പരിഗണിക്കവെയാണ് കോടതി അധികൃതര്‍ക്ക് നിര്‍ദേശം നല്‍കിയത്. പനി, ചുമ, ജലദോഷം, ശ്വാസതടസം, ശാരീരിക ക്ഷീണം ഉള്‍പ്പെടെയുള്ള അസുഖങ്ങള്‍ക്ക് സാധാരണ ഗോത്രവര്‍ഗക്കാര്‍ ചോണനുറുമ്പ് ചട്ണി മരുന്നായി നല്‍കുന്നുണ്ടെന്നും മികച്ച ഫലം ലഭ്യമാകുന്നുണ്ടെന്നും പാദിയാല്‍ അവകാശപ്പെട്ടിരുന്നു. 

ഉറുമ്പിനൊപ്പം പച്ചമുളക്, ഉപ്പ് എന്നിവ ചേര്‍ത്താണ് ചട്ണി തയാറാക്കുന്നത്. 

ചിക്കന്‍പോക്‌സ് ഉള്‍പ്പെടെയുള്ള രോഗങ്ങള്‍ക്കും ഈ മരുന്ന് തന്നെയാണ് ഗോത്രവര്‍ഗക്കാര്‍ ഉപയോഗിക്കുന്നതെന്നും അദ്ദേഹം ഹരജിയില്‍ ചൂണ്ടിക്കാട്ടിയിരുന്നു.