ന്യൂഡല്‍ഹി: ഉത്തര്‍പ്രദേശില്‍ അടുത്ത വര്‍ഷം നടക്കാനിരിക്കുന്ന നിയമസഭാ തെരഞ്ഞെടുപ്പില്‍ ബി.ജെ.പിക്കെതിരേ ഒറ്റയ്ക്ക് മത്സരിക്കും എന്‍.ഡി.എ സഖ്യകക്ഷിയായ ജെ.ഡി.യു. ബുധനാഴ്ചയാണ് ജെ.ഡി.യു ഇത് സംബന്ധിച്ച് തീരുമാനമെടുത്തത്.

2022ലെ ഉത്തര്‍പ്രദേശ് തെരഞ്ഞെടുപ്പില്‍ ഒറ്റക്ക് മത്സരിക്കാനാണ് ജെ.ഡി.യു തീരുമാനം. പാര്‍ട്ടി ദേശീയകമ്മിറ്റിയുടെ തീരുമാനം ഐക്യകണ്ഠേനയായിരുന്നെന്നും ജനറല്‍ സെക്രട്ടറി കെസി ത്യാഗി എന്‍.ഡി.ടി.വിയോട് പറഞ്ഞു. ഉത്തര്‍പ്രദേശില്‍ ഒറ്റക്ക് മത്സരിക്കുന്നത് ബിഹാറിലെ സഖ്യത്തിന് യാതൊരു പ്രശ്നവുമില്ലെന്നും അദ്ദേഹം വ്യക്തമാക്കി.

ബിഹറില്‍ ജെ.ഡി.യു-ബിജെപി സഖ്യമാണ് ഭരിക്കുന്നത്. ബി.ജെ.പിയാണ് മുന്നണിയിലെ ഏറ്റവും വലിയ ഒറ്റകക്ഷിയെങ്കിലും ജെ.ഡി.യു നേതാവ് നിതീഷ് കുമാറാണ് മുഖ്യമന്ത്രി. 2017ല്‍ ജെ.ഡി.യു യു.പി.യില്‍ മത്സരിക്കാത്തത് പാര്‍ട്ടിക്ക് ക്ഷീണം ചെയ്തു. ബിഹാറിനോട് ചേര്‍ന്ന് കിടക്കുന്ന സംസ്ഥാനമാണ് യുപി. സംസ്ഥാന സര്‍ക്കാരിന്റെ നയങ്ങള്‍ക്ക് പ്രചാരമുണ്ട്. അതുകൊണ്ട് 2022ല്‍ നടക്കുന്ന തെരഞ്ഞെടുപ്പില്‍ യു.പിയില്‍ മത്സരിക്കും- ത്യാഗി വ്യക്തമാക്കി.