ജിദ്ദ: സഊദിയിൽ ഇന്ത്യക്കാരനെ കൊലപ്പെടുത്തിയ കേസിലെ രണ്ടു സ്വദേശികൾ പിടിയിൽ. കവർച്ച ലക്ഷ്യത്തോടെ ഇന്ത്യക്കാരനെ കൊലപ്പെടുത്തുകയും മറ്റൊരു ഇന്ത്യക്കാരനെ ആക്രമിച്ച് പരിക്കേൽപിക്കുകയും ചെയ്ത കേസിലാണ് ഇവരെ അൽഖസീമിൽ നിന്ന് സുരക്ഷാ വകുപ്പുകൾ അറസ്റ്റ് ചെയ്തത്. മുപ്പതിനടുത്ത് പ്രായമുള്ളവരാണ് പിടിയിലായത്.

അല്‍ഖസീമിലെ മരുഭൂമിയില്‍ കഴിഞ്ഞ മൂന്നു ദിവസം മുന്‍പായിരുന്നു സംഭവം. ഇരുമ്പു വടികൊണ്ടാണ് ഇന്ത്യക്കാരെ സംഘം ആക്രമിച്ചത്. അതിനു ശേഷം ആകാശത്തേക്ക് നിറയൊഴിച്ച് ഭീതി സൃഷ്ടിക്കുകയും 36 ആടുകളെ കവരുകയുമായിരുന്നു. ഗുരുതരമായി പരിക്കേറ്റ രണ്ട് ആട്ടിടയന്‍മാരില്‍ ഒരാള്‍ പിന്നീട് മരിച്ചു. മറ്റെയാള്‍ ചികിത്സയിലാണ്.

ജനുവരി 24 നാണ് ഇതേ കുറിച്ച് സുരക്ഷാ വകുപ്പുകൾക്ക് വിവരം ലഭിച്ചത്. തുടർന്ന് നടത്തിയ ഊർജിതമായ അന്വേഷണത്തിലൂടെയാണ് പ്രതികളെ തിരിച്ചറിഞ്ഞത്. വെടിവെപ്പ് നടത്താൻ പ്രതികൾ ഉപയോഗിച്ച തോക്ക് സുരക്ഷാ വകുപ്പുകൾ കസ്റ്റഡിയിലെടുത്തിട്ടുണ്ട്.
നിയമാനുസൃത നടപടികൾ പൂർത്തിയാക്കി പ്രതികൾക്കെതിരായ കേസ് പബ്ലിക് പ്രോസിക്യൂഷന് കൈമാറിയതായി ആഭ്യന്തര മന്ത്രാലയം അറിയിച്ചു.