തിരുവനന്തപുരം: യു.എസ് കമ്പനിയായ ഇ.എം.സി.സിയുമായി ആഴക്കടല്‍ മീന്‍പിടിത്തവുമായി ബന്ധപ്പെട്ട് ഉണ്ടാക്കിയ ധാരണപത്രം റദ്ദാക്കി. പ്രതിപക്ഷ ആരോപണത്തിന് പിന്നാലെ മുഖ്യമന്ത്രി പിണറായി വിജയന്റെ നിര്‍ദ്ദേശത്തെത്തുടര്‍ന്നാണ് നടപടി.

400 ട്രോളറുകള്‍ നിര്‍മിക്കാനും അനുബന്ധ പ്രവര്‍ത്തനങ്ങള്‍ക്കുമായിരുന്നു ധാരണാപത്രം.

ഇന്നലെ രാവിലെ വാര്‍ത്താസമ്മേളനം നടത്തിയ പ്രതിപക്ഷ നേതാവ് രമേശ് ചെന്നിത്തല ഇ.എം.സി.സി സി.ഇ.ഒ ഡുവാന്‍ ജെറിന്‍സണ്‍ മുഖ്യമന്ത്രിയുമായി കൂടിക്കാഴ്ച നടത്തിയെന്ന് ആരോപിച്ചതോടെയാണ് സര്‍ക്കാര്‍ പ്രതിരോധത്തിലായത്.

ആരോപണങ്ങള്‍ തന്നിലേക്ക് കേന്ദ്രീകരിക്കുന്നുവെന്ന് കണ്ട് അമര്‍ഷത്തിലായ മുഖ്യമന്ത്രി കരാര്‍ അടിയന്തിരമായി പുനഃപരിശോധിക്കാനും ചട്ടവിരുദ്ധമാണെന്ന് കണ്ടെത്തിയാല്‍ റദ്ദാക്കാനും നിര്‍ദേശം നല്‍കുകയായിരുന്നു.