സൻആ
യമൻ പൗരനെ കൊലപ്പെടുത്തിയ കേസിൽ പാലക്കാട് കൊല്ലങ്കോട് സ്വദേശിനി നിമിഷപ്രിയ(33)യുടെ വധശിക്ഷ അപ്പീൽ കോടതി ശരിവച്ചു. വിചാരണക്കോടതി വധശിക്ഷ വിധിച്ചതിനെ തുടർന്ന് നിമിഷപ്രിയ ഇന്ത്യൻ എംബസിയുടെ സഹായത്തോടെ മേൽക്കോടതിയെ സമീപിക്കുകയായിരുന്നു.
സ്ത്രീയെന്ന പരിഗണന നൽകി കുറ്റവിമുക്തയാക്കുകയോ വധശിക്ഷയിൽ നിന്ന് ഒഴിവാക്കുകയോ വേണമെന്നായിരുന്നു നിമിഷയുടെ ആവശ്യം. എന്നാൽ, വധശിക്ഷ അപ്പീൽ കോടതി ശരിവയ്ക്കുകയായിരുന്നു.

ഇനി യമൻ പ്രസിഡന്റിന്റെ അധ്യക്ഷതയിലുള്ള സുപ്രിം ജുഡിഷ്യൽ കൗൺസിലിന്റെ പരിഗണനയ്ക്ക് കേസ് സമർപ്പിക്കാമെങ്കിലും അപ്പീൽ കോടതിയുടെ തീർപ്പ് സാധാരണഗതിയിൽ പുനഃപരിശോധിക്കാറില്ല. അപ്പീൽ കോടതിയിലെ നടപടിക്രമങ്ങൾ ശരിയായിരുന്നോയെന്ന് പരിശോധിക്കുക മാത്രമാണ് ചെയ്യുക.
2017 ജൂലൈ 25നാണ് കേസിനാസ്പദമായ സംഭവം നടന്നത്. യമനിൽ നഴ്‌സായി ജോലിചെയ്യുന്നതിനിടെ നിമിഷ യമൻകാരനായ തലാൽ അബ്ദു മഹ്ദിയെ(24) കൊലപ്പെടുത്തി വീട്ടിലെ വാട്ടർ ടാങ്കിൽ ഒളിപ്പിച്ചെന്നാണ് കേസ്. തലാലിനൊപ്പം ക്ലിനിക് നടത്തുകയായിരുന്നു നിമിഷ.
സ്വന്തമായി ക്ലിനിക് തുടങ്ങാൻ സഹായവാഗ്ദാനവുമായി എത്തിയ തലാൽ പാസ്‌പോർട്ട് പിടിച്ചെടുത്ത് പീഡിപ്പിച്ചതിനെ തുടർന്ന് ആത്മരക്ഷാർഥമാണ് കൊലപ്പെടുത്തിയതെന്നാണ് നിമിഷയുടെ വാദം. തലാലിന് അമിത ഡോസ് മരുന്ന് കുത്തിവച്ച് കൊലപ്പെടുത്തിയെന്നാണ് കേസ്.
തുടർന്ന് മറ്റൊരു നഴ്‌സായ ഹനാന്റെ സഹായത്തോടെ മൃതദേഹം വെട്ടിനുറുക്കുകയായിരുന്നു.

നിമിഷ തലാലിന്റെ ഭാര്യയാണെന്നതിന് യമനിൽ രേഖകളുണ്ട്. എന്നാൽ, ക്ലിനിക്കിനുള്ള ലൈസൻസ് എടുക്കുന്നതിനുണ്ടാക്കിയ താൽക്കാലിക രേഖ മാത്രമാണിതെന്നാണ് നിമിഷയുടെ വാദം.

ഇടുക്കി സ്വദേശിയായ ടോമി തോമസിന്റെ ഭാര്യയായ നിമിഷയ്ക്ക് ഏഴു വയസുകാരിയായ ഒരു മകളുണ്ട്.
2014ലാണ് നിമിഷ തലാലുമായി പരിചയത്തിലാകുന്നത്. അന്ന് യമനിൽ ജോലി ചെയ്യുകയായിരുന്ന ടോമിയുടെ പരിചയക്കാരനായിരുന്നു തലാൽ. കൂട്ടുപ്രതിയായ ഹനാന് ജീവപര്യന്തം തടവുശിക്ഷയാണ് ലഭിച്ചത്.
തലാലിന്റെ കുടുംബത്തിന് നഷ്ടപരിഹാരത്തുക നൽകി കോടതിനടപടികളിൽ നിന്ന് മുക്തയാകാൻ ശ്രമിച്ചെങ്കിലും വിജയിച്ചിരുന്നില്ല.